ప్రాణాలు తీసిన అతివేగం.. చిన్నారి సహా ఆరుగురి మృతి

హాసన, న్యూస్‌టుడే:  కర్ణాటక రాష్ట్రం హాసన నగర శివారు ఈచనహళ్లి వద్ద ఆదివారం వేకువజామున జరిగిన రోడ్డు ప్రమాదంలో చిన్నారి సహా ఆరుగురు మరణించారు. మంగళూరుకు వెళ్లే జాతీయ రహదారిలో వేగంగా వెళ్తున్న కారు అదుపుతప్పి డివైడర్‌ను ఢీకొని, మరో వైపునకు పల్టీ కొట్టింది. అదే సమయంలో అటుగా వస్తున్న కంటెయినర్‌ లారీని ఢీకొనడంతో..చిక్కబళ్లాపుర సమీపంలోని కారళ్లి, అందరహళ్లి గ్రామాలకు చెందిన నారాయణప్ప (55), సునంద (52)దంపతులు.. వారి కుమారుడు రవికుమార్‌ (30), కోడలు నేత్ర (28), మనవడు చేతన్‌ (4), కారు డ్రైవరు రాకేశ్‌ (35) అక్కడికక్కడే మృతిచెందారు. నారాయణప్పకు మంగళూరులో చికిత్స ఇప్పించి, తిరిగి వస్తున్న సమయంలో ఈ ప్రమాదం చోటుచేసుకుంది.