ఉమామహేశ్వర్‌రావుకు మూడు రోజుల కస్టడీ

ఈనాడు, హైదరాబాద్‌: ఆదాయానికి మించిన ఆస్తుల కేసులో అరెస్టై రిమాండులో ఉన్న సీసీఎస్‌ ఏసీపీ ఉమామహేశ్వర్‌రావు కస్టడీ కోరుతూ ఏసీబీ అధికారులు దాఖలు చేసిన పిటిషన్‌ను మంగళవారం అనిశా కోర్టు విచారించింది. నిందితుడ్ని కస్టడీలోకి తీసుకుంటే అక్రమాస్తుల వివరాలన్నీ బయటపడే అవకాశం ఉందని, 10 రోజులపాటు కస్టడీకి ఇవ్వాలని అధికారులు కోర్టును కోరారు. న్యాయస్థానం 3 రోజుల కస్టడీకి అనుమతించింది. ఆదాయానికి మించి ఆస్తుల కేసులో ఉమామహేశ్వర్‌రావును గతవారం అదుపులోకి తీసుకున్న ఏసీబీ అధికారులు నాంపల్లిలోని ఏసీబీ కోర్టులో ప్రవేశపెట్టగా న్యాయస్థానం 14 రోజుల రిమాండ్‌ విధించడంతో ఆయనను చంచల్‌గూడ జైలుకు తరలించిన సంగతి తెలిసిందే.