అప్పుల బాధతో కౌలు రైతు ఆత్మహత్య

గీసుకొండ, న్యూస్‌టుడే: వరంగల్‌ జిల్లా గీసుకొండ మండలం కొమ్మాలలో అప్పుల బాధతో బుధవారం ఓ కౌలు రైతు ఆత్మహత్యకు పాల్పడ్డారు. మృతుడి కుటుంబ సభ్యులు తెలిపిన వివరాల ప్రకారం.. కొమ్మాలకు చెందిన గడ్డమీది అశోక్‌ (43) ఓ రైతుకు చెందిన రెండున్నర  ఎకరాలు కౌలుకు తీసుకొని ఐదేళ్లుగా పత్తి, మొక్కజొన్న, కూరగాయల పంటలు సాగుచేస్తున్నారు. ఆశించిన దిగుబడులు రాక.. రూ.6 లక్షల వరకూ అప్పుల పాలయ్యారు. ఈ బాధతో వ్యవసాయ బావి వద్ద పురుగు మందు తాగారు. ప్రాణాపాయ స్థితిలో ఉన్న ఆయనను కుటుంబ సభ్యులు వరంగల్‌లోని ఎంజీఎం ఆసుపత్రికి తరలించగా చికిత్స పొందుతూ రాత్రి మృతి చెందారు. ఆయనకు భార్య, ముగ్గురు పిల్లలు ఉన్నారు.