నకిలీ ఆధార్‌ కార్డులతో పార్లమెంటులో పనిలోకి!

ముగ్గురిని అరెస్టుచేసిన భద్రతా సిబ్బంది

దిల్లీ: నకిలీ ఆధార్‌ కార్డులతో పార్లమెంటు ఆవరణలో జరుగుతున్న నిర్మాణ పనులకు వచ్చిన ముగ్గురిని మంగళవారం సీఐఎస్‌ఎఫ్‌ భద్రతా సిబ్బంది అరెస్టు చేశారు. ఆలస్యంగా వెలుగులోకి వచ్చిన ఈ ఘటనలో కసిం, మోనిస్, షోయబ్‌లను అరెస్టు చేసి వివిధ సెక్షన్ల కింద కేసులు నమోదు చేశారు. ఈ ముగ్గురిని డీ వీ ప్రాజెక్ట్స్‌ కంపెనీ నిర్మాణ పనుల్లో నియమించుకుంది. ఎంపీ లాంజ్‌ల నిర్మాణ పనుల కోసం ఆ ముగ్గురు నకిలీ ఆధార్‌ కార్డులతో పార్లమెంటు ఆవరణలోకి వచ్చారు. సీఐఎస్‌ఎఫ్‌ తనిఖీల సమయంలో ఆధార్‌ కార్డులు నకిలీవని తేలింది. దీంతో వారిని అరెస్టు చేసి దిల్లీ పోలీసులకు అప్పగించారు. ముగ్గురిపై ఫోర్జరీ, మోసం, నేరపూరిత్ర కుట్ర కేసులను పోలీసులు నమోదు చేసి విచారిస్తున్నారు.