ఛత్తీస్‌గఢ్‌లో ఏడుగురు మావోయిస్టుల హతం

ముగ్గురు జవాన్లకు గాయాలు

దుమ్ముగూడెం, న్యూస్‌టుడే: ఛత్తీస్‌గఢ్‌ రాష్ట్రం నారాయణపుర్‌- దంతెవాడ జిల్లాల సరిహద్దుల్లో శుక్రవారం మావోయిస్టు దళాలకు, భద్రతా బలగాలకు మధ్య జరిగిన ఎదురు కాల్పుల్లో ఏడుగురు మావోయిస్టులు హతమయ్యారు. యాంటీ నక్సల్‌ ఆపరేషన్‌లో భాగంగా భద్రతా బలగాలు ముంగేడు గ్రామ శివారులోని గోబెల్‌ అటవీ ప్రాంతంలో కూంబింగ్‌ చేపడుతుండగా. మావోయిస్టులు కాల్పులకు తెగబడ్డారు. బలగాలు ప్రతిఘటించడంతో ఏడుగురు మావోయిస్టులు అక్కడికక్కడే మృతిచెందారు. ఘటనా స్థలంలో వారి మృతదేహాలతో పాటు ఆయుధాలు, పేలుడు పదార్థాలను స్వాధీనం చేసుకున్నారు. మృతిచెందిన మావోయిస్టులను గుర్తించేందుకు పోలీసులు సమాచారం సేకరిస్తున్నారు. ఈ ఘటనలో ముగ్గురు జవాన్లు సైతం గాయపడ్డారు.