Kota: ఐదేళ్ల బాలికపై ఉపాధ్యాయుడి కర్కశత్వం

కోటా: ఉపాధ్యాయుడు తీవ్రంగా కొట్టడంతో ఐదేళ్ల విద్యార్థి చేతి ఎముక విరిగిన దారుణ ఘటన రాజస్థాన్‌లోని కోటాలో చోటుచేసుకుంది. పోలీసులు తెలిపిన వివరాల ప్రకారం ఖేదరాసుల్‌పూర్‌ ప్రభుత్వ పాఠశాలలో 1వ తరగతి చదువుతున్న బాలికను ఉపాధ్యాయుడు తీవ్రంగా కొట్టి గాయపరిచాడు. అంతటితో ఆగకుండా చిన్నారి చేతిని బలంగా లాగి కొట్టడంతో బాలిక చేతి ఎముక విరిగింది. విషయం తెలుసుకున్న బాలిక తండ్రి పోలీస్‌ స్టేషన్‌లో ఫిర్యాదు చేశాడు. శనివారం పాఠశాల ఉపాధ్యాయుడు మహ్మద్‌ సత్తార్‌ను పోలీసులు అరెస్టు చేశారు. నిందితుడిని ఆదివారం కోర్టు ముందు హాజరు పరుస్తామని సర్కిల్‌ అధికారి తెలిపారు.