Jadcherla: పాఠశాల బస్సును ఢీకొట్టిన లారీ.. 28 మంది విద్యార్థులకు గాయాలు

జడ్చర్ల గ్రామీణం: మహబూబ్‌నగర్‌ జిల్లాలో రోడ్డు ప్రమాదం జరిగింది. జడ్చర్ల మండలం కొత్తతండా సమీపంలో పాఠశాల బస్సును లారీ ఢీకొట్టింది. ఈ ప్రమాదంలో 28 మంది విద్యార్థులు గాయపడ్డారు.

వివరాల్లోకి వెళ్తే.. ఓ ప్రైవేటు పాఠశాలకు చెందిన బస్సు విద్యార్థులతో జడ్చర్ల నుంచి మహబూబ్‌నగర్‌కు వెళ్తోంది. కొత్త తండాలో పాఠశాలకు సమీపంలో ఓ మలుపు వద్ద యూటర్న్‌ తీసుకుంటుండగా బస్సును వెనుక నుంచి వచ్చిన లారీ అదుపుతప్పి ఢీకొట్టింది. ఈ ప్రమాదంలో గాయపడిన 28 మంది విద్యార్థులను స్థానికులు మహబూబ్‌నగర్‌లోని ఓ ప్రైవేటు ఆసుపత్రికి తరలించి చికిత్స అందిస్తున్నారు. వీరిలో ఇద్దరి పరిస్థితి విషమంగా ఉన్నట్లు వైద్యుల తెలిపారు. సమాచారం అందుకున్న జిల్లా విద్యాధికారి రవీందర్‌, పోలీసులు ఘటనాస్థలానికి చేరుకుని పరిస్థితిని సమీక్షించారు.