Crime News: పుట్టిన వెంటనే పిల్లల్ని చంపి.. ఏళ్ల పాటు ఫ్రిజ్‌లోనే పెట్టి..!

ఇంటర్నెట్‌ డెస్క్‌: ఓ తల్లి కర్కశంగా వ్యవహరించింది. తనకు పుట్టిన బిడ్డలను తానే చంపడం మొదలుపెట్టింది. అంతటితో ఆగకుండా వారి మృతదేహాలను ఫ్రిజ్‌లో భద్రపరిచింది. రోజులు కాదు.. నెలలు కాదు.. కొన్నేళ్ల పాటు ఇలా ఫ్రీజర్‌లో ఉంచడం గమనార్హం. ఈ వ్యవహారం దక్షిణ కొరియాలో ఇటీవల వెలుగు చూసింది. రంగంలోకి దిగిన పోలీసులు.. వారెంటు తీసుకొని ఆమెను అరెస్టు చేసేందుకు సిద్ధమయ్యారు.

దక్షిణ కొరియాలోని సువాన్‌ నగరానికి చెందిన ఓ మహిళకు ముగ్గురు పిల్లలు ఉన్నారు. ఒక్కొక్కరి వయసు 8 నుంచి 12 ఏళ్ల మధ్య ఉంది. వీరు కాకుండా 2018లో ఆమె ఓ పాపకు జన్మనిచ్చింది. పుట్టిన మరుసటి రోజే ఆ బిడ్డను చంపి ఇంట్లోని ఫ్రిజ్‌లో పెట్టింది. తర్వాత 2019 నవంబర్‌లో మరో పాప పుట్టగా.. ఇదే దారుణానికి ఒడిగట్టింది. ఆస్పత్రిలో డెలివరీ అయినట్లు రికార్డులు ఉన్నప్పటికీ పుట్టిన తర్వాత పిల్లల పేర్లు ఎక్కడ నమోదు చేయకపోవడంతో అధికారులకు అనుమానం వచ్చింది. ఆ ఏడాది మేలో అధికారులు ఆరా తీయగా ఈ ఉదంతం వెలుగులోకి వచ్చింది.

అధికారుల ఫిర్యాదుతో రంగంలోకి దిగిన పోలీసులు దర్యాప్తు మొదలుపెట్టారు.  తొలుత పోలీసుల దర్యాప్తునకు ఆమె సహకరించలేదు. దీంతో సెర్చ్‌ వారెంట్‌ తీసుకొని వచ్చి ఆమె ఇంట్లో సోదాలు జరిపారు. ఆ క్రమంలోనే ఫ్రిజ్‌లో రెండు మృతదేహాలు బయటపడ్డాయి. దీనిపై పోలీసులు ఆమెను ప్రశ్నించగా.. ఆ హత్యలు తానే చేసినట్లు అంగీకరించింది. పిల్లల్ని పోషించే ఆర్థిక స్థితి లేకపోవడంతోనే అలా ప్రాణాలు తీసినట్లు తెలిపింది. తన భార్య అబార్షన్‌ చేయించుకున్నట్లు చెప్పిందని.. అందుకే ఈ దారుణం గురించి తనకు తెలియదని భర్త పోలీసులకు చెప్పడం గమనార్హం.