AFTC: ట్రైనీ క్యాడెట్‌ మృతి.. ఆరుగురు ఏయిర్‌ఫోర్స్‌ అధికారులపై హత్యాకేసు!

బెంగళూరు: ఓ భారత వాయుసేన(IAF) ట్రైనీ క్యాడెట్‌ ఆత్మహత్య వ్యవహారంలో ఆరుగురు ఎయిర్‌ఫోర్స్‌ అధికారులపై హత్యాకేసు నమోదైంది. బెంగళూరులోని ఎయిర్‌ ఫోర్స్‌ టెక్నికల్‌ కాలేజీ(AFTC)లో ఈ ఘటన చోటుచేసుకుంది. పోలీసుల వివరాల ప్రకారం.. ఏఎఫ్‌టీసీ క్యాంపస్‌లోని ఓ గదిలో అంకిత్ ఝా(27) అనే ట్రైనీ క్యాడెట్‌ ఇటీవల ఉరేసుకుని కనిపించాడు. అతనిపై అప్పటికే కోర్టు విచారణ సాగుతోందని, దీంతో శిక్షణ నుంచీ తొలగించినట్లు పోలీసులు వెల్లడించారు. ఈ క్రమంలోనే.. నాలుగైదు రోజుల క్రితమే ఆత్మహత్యకు పాల్పడి ఉండొచ్చని అనుమానిస్తున్నారు. మృతుడి సోదరుడి ఫిర్యాదు మేరకు శనివారం స్థానిక ఠాణాలో ఆరుగురు ఎయిర్‌ఫోర్స్‌ అధికారులపై ఈ మేరకు కేసు నమోదు చేసినట్లు తెలిపారు.

ఈ ఘటనలో ఏఎఫ్‌టీసీ అధికారులు సాక్ష్యాలను తారుమారు చేసే ప్రయత్నం చేశారని మృతుడి సోదరుడు తన ఫిర్యాదులో ఆరోపించారు. తన సోదరుడికి కాలేజీ క్యాంపస్‌లో నిత్యం వేధింపులు, చిత్రహింసలు ఎదురయ్యాయని ఆరోపించారు. దీనిపై ఓ సీనియర్‌ పోలీసు అధికారి స్పందిస్తూ.. ‘ఈ ఘటనపై దర్యాప్తు కొనసాగుతోంది. మృతి వెనుక కారణాలు తెలియాల్సి ఉంది. పోస్ట్‌మార్టం నివేదిక కోసం ఎదురుచూస్తున్నాం’ అని ఓ వార్తాసంస్థకు తెలిపారు. నిందితులను ఇంకా అరెస్టు చేయలేదని చెప్పారు. కేసు విచారణలో అన్ని విధాలుగా సహకరిస్తామని వాయుసేన హామీ ఇచ్చినట్లు వెల్లడించారు.