Tamil Nadu: భార్య ఫిర్యాదు.. మాజీ అదనపు డీజీపీ అరెస్టు

చెన్నై: తమిళనాడు మాజీ అదనపు డీజీపీ రాజేశ్ దాస్‌ను అక్కడి పోలీసులు అరెస్టు చేశారు. ఆయన భార్య బీలా వెంకటేశన్‌ ఫిర్యాదు మేరకు అదుపులోకి తీసుకున్నట్లు వెల్లడించారు. బీలా వెంకటేశన్‌ ప్రస్తుతం విద్యుత్‌శాఖ కార్యదర్శిగా పని చేస్తున్నారు. ఈనెల 18న రాజేశ్‌ తన అనుచరులతో కలిసి తయూర్‌ నగర శివారులోని తన ఇంటిలోకి దౌర్జన్యంగా చొరబడ్డారని, కాపలాగా ఉన్న సెక్యూరిటీ గార్డును దూషించారని ఆమె సోమవారం పోలీసులకు ఫిర్యాదు చేశారు. దీనిపై కేసు నమోదు చేసిన పోలీసులు తాజాగా ఆయన్ని అరెస్టు చేశారు.

మహిళా ఐపీఎస్‌పై లైంగిక వేధింపులు.. మాజీ ADGPకి మూడేళ్ల జైలు

కుటుంబ కలహాల నేపథ్యంలో గత కొన్నేళ్లుగా వీరిద్దరూ వేర్వేరుగా జీవనం సాగిస్తున్నారు. ఏఐఏడీఎంకే హయాంలో రాజేశ్‌ దాస్‌ అదనపు డీజీపీగా సేవలందించారు. ఆ సమయంలో దిగువస్థాయి మహిళా ఐపీఎస్‌ అధికారిని లైంగికంగా వేధించిన కేసులో గతేడాది విల్లుపురం కోర్టు ఆయన్ని దోషిగా తేల్చి మూడేళ్ల జైలు శిక్ష విధించింది. అయితే, దీనిపై ఆయన సుప్రీంకోర్టును ఆశ్రయించగా.. అత్యున్నత న్యాయస్థానం ఆయనకు అరెస్టు నుంచి తాత్కాలిక ఉపశమనం కలిగించింది. కాగా, తాజాగా దౌర్జన్యం కేసులో ఆయన్ని పోలీసులు అరెస్టు చేశారు.