Crime: అసలే త్రిపుల్‌ రైడింగ్‌... ఒక్కరికి హెల్మెట్లు లేవు..పైగా వన్‌ వీల్‌తో విన్యాసాలు..

ముంబయి: నగరంలో రోజూ ఎక్కడో ఒక చోట ఏదో ఒక రూపంలో రోడ్డు ప్రమాదాలు జరగుతున్నా ఆకతాయి యువత మాత్రం వికృత చేష్టలు మానుకోవట్లేదు. శ్రుతి మించిన వేగంతో వాహనాలు నడుపుతున్నారు. ప్రాణాలను లెక్కచేయకుండా బైకులపై ప్రమాదకరమైన స్టంట్లు చేస్తూ తోటి ప్రయాణికులను ఇబ్బంది పెడుతున్నారు. తాజాగా ముంబయి(Mumbai)లో ఇదే తరహా ఘటన చోటుచేసుకుంది. 

వివరాల్లోకి వెళితే.. ఓ యువకుడు ముంబయి రోడ్ల మీద విచ్చలవిడిగా ప్రవర్తించాడు. ఇద్దరు యువతులను బైక్‌పై ముందు వెనక కూర్చోబెట్టుకొని ప్రమాదకరంగా స్టంట్లు చేశాడు. దీనికి సంబంధించిన వీడియో నెట్టింట చక్కర్లు కొట్టడంతో విషయం వెలుగుచూసింది. ఆ ముగ్గురిలో ఏ ఒక్కరూ హెల్మెట్‌ ధరించకపోవడం కొసమెరుపు. నిందితుడితో పాటు ఇద్దరు యువతులపై ముంబయి పోలీసులు శుక్రవారం కేసు నమోదు చేశారు. వారికి కేవలం జరిమానా విధించి వదిలేయకుండా చట్టపరమైన చర్యలు తీసుకుంటామని తెలిపారు. ‘‘ఈ వీడియోలో ఉన్నవారిపై బీకేసీ పోలీసు స్టేషన్‌లో కేసు నమోదైంది. నిందితుడిని గుర్తించడానికి విచారణ చేపట్టారు. ఎవరికైనా వారి గురించి సమాచారం తెలిస్తే మమ్మల్ని నేరుగా కలిసి వివరాలు తెలియజేయండి’’ అని ట్విటర్‌ వేదికగా ముంబయి ట్రాఫిక్‌ పోలీసులు పేర్కొన్నారు.