Taj Mahal: తాజ్‌ పర్యాటకుడిపై ఇనుపరాడ్లతో దాడి

తాజ్‌మహల్‌ అందాలను చూసేందుకు దిల్లీ నుంచి వెళ్లిన ఓ పర్యాటకుడిపై అక్కడి యువకులు కొందరు ఇనుప రాడ్లతో దాడి చేసి చేదు అనుభవం మిగిల్చారు. ఆదివారం నాటి ఈ దృశ్యాలు సామాజిక మాధ్యమాల్లో వైరల్‌గా మారాయి. అతడు ఓ మిఠాయిల దుకాణంలోకి వెళ్లగా.. వెంబడించి మరీ కర్రలు, ఇనుపరాడ్లతో చితగ్గొట్టారు. పోలీసులు అయిదుగురు నిందితులను అరెస్టు చేశారు. ఆ పర్యాటకుడు బసాయ్‌చౌకి - తాజ్‌గంజ్‌ మార్గంలో కారులో వెళ్తుండగా.. పక్కన నడిచి వెళుతున్నవారిలో ఒకరిని కారు తాకింది. పర్యాటకుడు కారు ఆపి.. వాళ్లకు క్షమాపణలు చెప్పారు. అయినా వినిపించుకోకుండా దుర్భాషలాడుతూ ఇలా దాడికి దిగారు. ప్రపంచ నలుమూలల నుంచి పర్యాటకులు ఇక్కడికి వస్తుంటారని, వాళ్లకూ ఇలాంటి పరిస్థితులే ఎదురైతే దేశం పరువు పోతుందని స్థానికులు అసహనం వ్యక్తం చేశారు.