Hyderabad: పారాగ్లైడింగ్‌ చేస్తూ హైదరాబాద్‌ టూరిస్టు మృతి

కులూ: హైదరాబాద్‌కు చెందిన ఓ టూరిస్టు పారాగ్లైడింగ్‌ చేస్తూ ప్రమాదవశాత్తు మృతిచెందారు. ఈ విషాదకర సంఘటన హిమాచల్‌ప్రదేశ్‌లోని కులూలో చోటుచేసుకుంది. దీంతో నిర్లక్ష్యంగా వ్యవహరించిన పారాగ్లైడింగ్‌ పైలట్‌ను పోలీసులు అరెస్టు చేశారు. సెఫ్టీ బెల్ట్‌ను తనిఖీ చేయకుండానే అనుమతించడంతో ఈ ప్రమాదం జరిగినట్లు ప్రాథమిక అంచనా. 

కులూ పర్యాటక శాఖ అధికారిణి సునైన శర్మ ఈ ఘటనపై స్పందించారు. మానవ తప్పిదమే ఈ దురదృష్టకర సంఘటనకు దారితీసి ఉండొచ్చని అభిప్రాయపడ్డారు. పారాగ్లైడింగ్‌ చేసిన ప్రదేశం, ఎక్విప్‌మెంట్‌కు అనుమతి ఉందని, పైలట్‌కు రిజిస్ట్రేషన్‌ ఉందన్నారు. వాతావరణ సమస్యలు సైతం లేవన్నారు. ఈ ప్రమాదంతో ప్రస్తుతం అక్కడ పారాగ్లైడింగ్‌ను సస్పెండ్‌ చేసినట్లు తెలిపారు. ఐపీసీ సెక్షన్‌ 336, 334 కింద పైలట్‌పై పోలీసులు కేసు నమోదు చేశారని, ఈ ఘటనపై విచారణకు ఆదేశించినట్లు అధికారిణి చెప్పారు. మృతిచెందిన టూరిస్టు పూర్తి వివరాలు తెలియాల్సి ఉంది.