kidnap drama : లవర్‌తో వెళ్లిపోయి.. డబ్బుల కోసం తండ్రికి ఫోన్‌ చేసి కిడ్నాప్‌ డ్రామా ఆడి..

యూపీకి (Uttar pradesh) చెందిన ఓ యువతి తన ప్రియుడితో కలిసి జీవించేందుకు సరికొత్త ఎత్తగడ వేసింది. తాను అపహరణకు గురయ్యానని నాటకమాడింది.

Published : 07 Aug 2023 20:13 IST

లఖ్‌నవూ : ఇంట్లో నుంచి పారిపోయిన ఓ యువతి ప్రియుడితో కలిసి జీవించేందుకు డబ్బులు లేకపోవడంతో ఓ సరికొత్త నాటకానికి తెరలేపింది. తనను కిడ్నాప్‌ చేశారని, రూ.10 లక్షలు చెల్లించి విడిపించాలని కోరుతూ తండ్రికి వీడియో సందేశం పంపించింది. ఉత్తరప్రదేశ్‌లోని (Uttar pradesh) కాన్పూర్‌లో ఈ వింత ఘటన వెలుగు చూసింది. పోలీసులు తెలిపిన వివరాల ప్రకారం.. వర్మ అనే వ్యక్తికి ఓ కుమార్తె ఉంది. ఈ నెల 4న ఆమె తన ప్రియుడితో కలిసి పారిపోయింది. వారిద్దరూ కలిసి ఓ హోటల్‌లో అద్దెకు దిగారు. జీవితాంతం కలిసి బతికేందుకు కావాల్సినంత డబ్బు తమ వద్ద లేకపోవడంతో కిడ్నాప్‌ డ్రామా ఆడాలని వారు నిర్ణయించుకున్నారు.

జలపాతంలో పడిపోయిన కారు.. అందులో 12ఏళ్ల బాలిక!

పక్కా ప్లాన్ ప్రకారం.. ఆ యువతిని కట్టేసి ఉంచిన వీడియోను తండ్రి వర్మకు పంపారు. ఆమెను కిడ్నాప్‌ చేశామని, రూ.10 లక్షలు ఇచ్చి విడిపించుకోవాలని అందులో డిమాండ్‌ చేశారు. వీడియోలో యువతి అరుస్తూ.. తనను కాపాడమని వేడుకుంది. దాంతో కంగారు పడిపోయిన తండ్రి పోలీసులను ఆశ్రయించాడు. వెంటనే వారు ఎఫ్‌ఐఆర్‌ నమోదు చేసుకొని మొబైల్‌ లొకేషన్‌ ఆధారంగా విచారణ చేపట్టారు. పోలీసుల వెతుకులాట ప్రారంభించగా.. ఆ ఇద్దరూ ఓ హోటల్‌ గదిలో కనిపించారు. మే 22వ తేదీనే వారు పెళ్లి కూడా చేసుకున్నట్లు పోలీసులకు తెలియడంతో ఆశ్చర్యపోయారు. అందుకు సంబంధించిన వివాహ ధ్రువీకరణ పత్రాన్ని స్వాధీనం చేసుకున్నారు. తగినంత డబ్బు లేకపోవడంతోనే ఈ కిడ్నాప్‌ నాటకం ఆడారని పోలీసులు నిర్ధారించారు. 
 

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని