వైకాపా జడ్పీటీసీ సభ్యుడి రెస్టారెంట్లో జూదం

పోలీసుల దాడి : 14 మంది అరెస్టు

తిరువూరు, న్యూస్‌టుడే: జూద శిబిరం జరుగుతున్న హోటల్‌ నిర్వాహకుడైన తిరువూరు జడ్పీటీసీ సభ్యుడిని పోలీసులు అరెస్టు చేశారు. పోలీసులు తెలిపిన వివరాల ప్రకారం ఎన్టీఆర్‌ జిల్లా తిరువూరు పట్టణ సమీపంలోని ఆర్‌కే రెస్టారెంటులో జూద శిబిరం నిర్వహిస్తున్నారన్న సమాచారం మేరకు ఎస్సై జీవీవీ సత్యనారాయణ సిబ్బందితో కలిసి శనివారం అర్ధరాత్రి దాడి చేశారు. జూదం ఆడుతున్న 13 మందిని అదుపులోకి తీసుకుని వారి వద్ద నుంచి రూ.30 వేల నగదు, 12 సెల్‌ఫోన్లు స్వాధీనం చేసుకున్నారు. పట్టుబడిన 13 మందితోపాటు రెస్టారెంట్‌ నిర్వాహకుడైన వైకాపా తిరువూరు జడ్పీటీసీ సభ్యుడు యరమల రామచంద్రారెడ్డిని అరెస్టు చేసినట్లు ఎస్సై తెలిపారు.