జగన్‌, మంత్రి పెద్దిరెడ్డికి ఇవే చివరి ఎన్నికలు: మాజీ మంత్రి అమరనాథరెడ్డి

మాట్లాడుతున్న మాజీ మంత్రి అమరనాథరెడ్డి

పలమనేరు, న్యూస్‌టుడే: వైకాపా పాలనపై ప్రజల తిరుగుబాటు చూస్తుంటే ఈ ఎన్నికలే సీఎం జగన్‌, మంత్రి పెద్దిరెడ్డికి ఇవే చివరి ఎన్నికలవుతాయని మాజీ మంత్రి అమరనాథరెడ్డి ఎద్దేవా చేశారు. శుక్రవారం ఆయన మండలంలోని పెగరగుంట గ్రామంలో విలేకర్లతో మాట్లాడారు. పెద్దపంజాణి మండలంలో పెద్దిరెడ్డి తనపై చేసిన విమర్శలకు ఘాటుగా స్పందించారు. పుంగనూరు నియోజకవర్గానికి నేను ఏమీ చేయలేదంటున్నారని ఇప్పుడు ఆయన వేస్తున్న రోడ్లన్నీ గత ప్రభుత్వంలో ఈఏపీ కింద నారా లోకేశ్‌ పంచాయతీరాజ్‌ మంత్రిగా ఉన్న సమయంలో తీసుకొచ్చినవేనని గుర్తు చేశారు. కల్లుపల్లె- చౌడేపల్లె రోడ్డు, పుంగమ్మ చెరువు అభివృద్ధి కనిపించడం లేదా అని ప్రశ్నించారు. ఈ దేశంలో ఎక్కడా లేని విధంగా చెరువులో చెరువు కట్టి అభివృద్ధి అంటున్న పెద్దిరెడ్డిని చూసి జనం నవ్వుకుంటున్నారని విమర్శించారు. మీరు మాట్లాడే భాష సరైనదేనా ఒకసారి చూసుకోండి.. దరిద్రుడు అని సంబోధించడం మీ వయసుకు తగునా.. అష్ట దరిద్రుడు అని నేను సంభోదించగలను.. విజ్ఞత అడ్డొచ్చి మాట్లాడలేకున్నా.. పుంగనూరు ప్రజలు సిద్దంగా ఉన్నారు.. మిమ్మల్ని ప్యాక్‌ చేసి వెనక్కి పంపడానికి. అక్కడ చూసుకోండి.. అని హితవు పలికారు.