పిన్నెల్లి సోదరులను జైలుకు పంపాలి.. ఘర్షణలకు వారే కారణం: మాజీ మంత్రి నక్కా ఆనందబాబు

నక్కా ఆనందబాబుకు నోటీసులు అందజేస్తున్న అరండల్‌పేట సీˆఐ

పట్టాభిపురం, న్యూస్‌టుడే: పల్నాడులో ఘర్షణలకు కారణమైన పిన్నెల్లి సోదరుల్ని జైలుకు పంపి శాంతి, భద్రతలు కాపాడాలని మాజీ మంత్రి, తెదేపా పొలిట్బ్యూరో సభ్యుడు నక్కా ఆనందబాబు డిమాండ్‌ చేశారు. మాచర్లకు వెళ్లకుండా ఆయనకు పోలీసులు గురువారం నోటీసులు జారీ చేసి గృహ నిర్బంధం చేశారు. ఆనందబాబు మాట్లాడుతూ ‘మాచర్లలో జరుగుతున్న హింసను అదుపు చేయడం చేతగాని పోలీసులు కొందరు ఇప్పుడు హడావుడి చేస్తున్నారు. కారంపూడిలో మూడు గంటలకు పైగా మృగాల్లా స్వైర విహారం చేశారు. వైకాపా నేతలకు కోవర్టులుగా పోలీసులు సహకరించి గొడవలకు పరోక్షంగా కారణమయ్యారు. అంతా అయిపోయాక 144 సెక్షన్‌ పెట్టాం. అదుపులోకి వచ్చిందని చెప్పడం సిగ్గుమాలిన చర్య. అయిదేళ్లుగా తెదేపా నాయకులు, కార్యకర్తలపై అక్రమ కేసులు పెట్టడం, జైలుకు పంపపడం, దాడులు చేయడం వంటి అనాగరిక పనులకు పాల్పడ్డారు. ఇకనైనా అటుంటి వాటికి స్వస్తి పలకాలి. మాచర్లలో హింసను ప్రేరేపిస్తున్న మాచర్ల ఎమ్మెల్యే పిన్నెల్లి రామకృష్ణారెడ్డి, అతని సోదరుడిపై తక్షణమే కేసులు నమోదు చేసి జైలుకు పంపాలి’.. అని డిమాండ్‌ చేశారు.