తండ్రిని హతమార్చిన కుమారుడు

బూడిద సుదర్శన్‌

ఉప్పల్‌, న్యూస్‌టుడే: వాగ్వాదం సమయంలో కుమారుడు కొట్టడంతో తండ్రి మృతి చెందిన ఘటన ఉప్పల్‌ పోలీస్‌స్టేషన్‌ పరిధిలో జరిగింది. రామంతాపూర్‌ వెంకట్‌రెడ్డినగర్‌లో ఉండే బూడిద సుదర్శన్‌(58)కు భార్య గోపమ్మ, ఇద్దరు కుమారులు సాయికుమార్‌, శివకుమార్‌, కుమార్తె స్వప్న ఉన్నారు. కొంతకాలంగా సుదర్శన్‌ మద్యానికి బానిసై, ఏ పనీ చేయడం లేదు. శుక్రవారం  సుదర్శన్‌, భార్య గోపమ్మ, శివకుమార్‌ల మధ్య గొడవ జరిగింది. ఆవేశంతో శివకుమార్‌, గోపమ్మ పైపులతో సుదర్శన్‌పై దాడి చేయడంతో స్పృహ తప్పిపడిపోయాడు. స్థానికంగా ఉన్న ఓ ఆస్పత్రికి తరలించగా అప్పటికే మృతి చెందినట్లు వైద్యులు తెలిపారు. సుదర్శన్‌ సోదరుడు పెంటయ్యకు.. మృతుడి ఒంటిపై గాయాలు కనిపించడంతో శనివారం పోలీసులకు ఫిర్యాదు చేశాడు. పోలీసుల విచారణలో ఈ విషయాలు వెలుగుచూశాయి.

ప్రేమకు అడ్డు చెప్పారని.. ప్రియుడి బలవన్మరణం

దిలీప్‌

షాబాద్‌, న్యూస్‌టుడే: మనస్తాపంతో ప్రియుడు ఆత్మహత్య చేసుకున్న ఘటన షాబాద్‌ పోలీసుస్టేషన్‌ పరిధిలో శనివారం జరిగింది. ఇన్‌స్పెక్టర్‌ గురవయ్యగౌడ్‌ కథనం ప్రకారం.. గోపిగడ్డకు చెందిన రాంజీ కుమారుడు దిలీప్‌(22) డ్రైవర్‌గా పని చేస్తున్నాడు. తల్లిదండ్రులు మరణించడంతో ఒక్కడే ఉంటున్నాడు. ఓ యువతిని ప్రేమించాడు. ఆమె కుటుంబసభ్యులు వారి ప్రేమకు అడ్డు చెప్పడంతో మనస్తాపంతో  గ్రామ శివారులోని చింతచెట్టుకు డ్రిప్‌ పైపుతో ఉరేసుకున్నాడు. గ్రామస్థులు పోలీసులకు సమాచారమిచ్చారు. మృతుని బంధువుల ఫిర్యాదు మేరకు కేసు దర్యాప్తు చేస్తున్నారు.