విమానాశ్రయంలో పార్కింగ్‌ చేసిన డీసీఎం దగ్ధం

శంషాబాద్‌, న్యూస్‌టుడే: పార్కింగ్‌ చేసిన ఓ డీసీఎం అగ్నికి ఆహుతైన సంఘటన శంషాబాద్‌ విమానాశ్రయంలో సోమవారం చోటు చేసుకుంది. అప్రమత్తమైన ఎయిర్‌పోర్ట్‌ అగ్నిమాపక సిబ్బంది మంటలను ఆర్పివేయడంతో అధికారులు, ఉద్యోగులు ఊపిరి పీల్చుకున్నారు. ఎయిర్‌పోర్ట్‌ అధికారులు తెలిపిన వివరాల ప్రకారం.. సంగారెడ్డి జిల్లా పటాన్‌చెరుకు చెందిన సురేష్‌ ట్రక్కు డ్రైవర్‌. తన డీసీఎం వ్యాన్‌ను ఈ నెల 20న ఎయిర్‌పోర్ట్‌ కార్గో కాంప్లెక్స్‌ సముదాయంలో పార్కింగ్‌ చేసి స్వగ్రామానికి వెళ్లాడు. ఎండల వేడికి షార్ట్‌ సర్క్యూట్‌ కావడంతో డీసీఎం ఇంజిన్‌లో మంటలు చెలరేగాయి. సిబ్బంది గమనించి అగ్నిమాపక సిబ్బందికి సమాచారం అందించారు. అగ్నిమాపక శకటం వచ్చేసరికి డీసీఎం వ్యాన్‌ పూర్తిగా దగ్ధమైంది. బాధితుడి ఫిర్యాదు మేరకు ఆర్జీఐఏ పోలీసులు కేసు నమోదు చేశారు.