పునాది దశ దాటని వంతెన

అశ్వాపురం, న్యూస్‌టుడే : అశ్వాపురం మండలం గొందిగూడెం ఇసుక వాగుపై వంతెన ఈఏడాది వర్షాకాలంలోనూ అందుబాటులోకి రాకపోవచ్చు. పనులు ప్రారంభించి ఏడాది గడిచినా పునాది దశ దాటలేదు. ఏటా వాగు ఉద్ధృతంగా ప్రవహిస్తుండటంతో గొందిగూడెం, కొత్తూరు, ఎలకలగూడెం, మనుబోతులగూడెం పంచాయతీలు, ఆవాస ప్రాంతాల ప్రజలు ఇక్కట్లు పడుతున్నారు. వంతెన నిర్మాణానికి గతేడాది మే29న శంకుస్థాపన చేశారు. పునాదుల తవ్వకం పనులు చేపట్టారు. వర్షాలు మొదలవటంతో పనులు నిలిచిపోయాయి. వర్షాకాలం ముగిసి తిరిగి పనులు ప్రారంభమవగానే శాసనసభ ఎన్నికలు వచ్చాయి. తర్వాత ప్రభుత్వం మారింది. ప్రత్యేక నిధులతో చేపట్టిన అనేక పనులను నూతన సర్కారు రద్దు చేసింది. ఎస్‌డీఎఫ్‌ నిధులతో చేపట్టిన ఈ వంతెన నిర్మాణంపై నీలినీడలు అలుముకున్నాయి. తర్వాత కాంగ్రెస్‌ ప్రభుత్వం తాజా ఆదేశాలు ఈ వంతెన నిర్మాణానికి అడ్డంకి కాబోవని అధికారులు గుర్తించారు. అంతలోపే లోక్‌సభ ఎన్నికల షెడ్యూల్‌ వచ్చింది. రూ.7 కోట్ల అంచనాతో చేపట్టిన వంతెన పనులకు ఇప్పటివరకు రూ.2.50కోట్లు ఖర్చయ్యాయి.ఈ అంశంపై ఆర్‌అండ్‌బీ డీఈ వి.వెంకటేశ్వరరావు స్పందిస్తూ ఎన్నికలు, నిధుల విడుదలలో జాప్యం, తదితరాలతో నిర్మాణ పనుల్లో జాప్యం జరిగిందన్నారు. శీతాకాలంలోగా వంతెన పూర్తవుతుందని తెలిపారు.