చెప్పాపెట్టకుండా రైల్వేగేటు గంటపాటు మూత

ఎలమంచిలి రైల్వేగేటు వద్ద భారీగా నిలిచిన వాహనాలు

ఎలమంచిలి, న్యూస్‌టుడే: ఎలమంచిలిలో సోమవారం కొక్కిరాపల్లి రైల్వేగేటు గంటపాటు మూసివేయడంతో ప్రయాణికులు పడరాని పాట్లు పడ్డారు. వరుసగా ఐదు రైళ్లు రాకపోకలు సాగించే వరకూ గేటు తెరవలేదు. ఒక దాని వెంట మరో రైలు వచ్చాయి. ఈ కారణంగా ఎక్కువ సమయం గేటు వద్ద వాహనాలు నిలిచిపోయాయి. గేటు తెరిచాక ఒక్కసారిగా రెండువైపులా వాహనాలు రావడంతో ట్రాఫిక్‌ ఆగిపోయింది. ఇందులో తొమ్మిది ఆర్టీసీ బస్సులు చిక్కుకోవడంతో ప్రయాణికులు ఇక్కట్లు పడ్డారు.

ఏటికొప్పాకలో మూడు రోజుల పాటు..

ఎలమంచిలి గ్రామీణం, న్యూస్‌టుడే: ఎలమంచిలి నుంచి ఏటికొప్పాక వెళ్లే మార్గంలో ఉన్న రైల్వేగేటు మూడు రోజుల పాటు మూసి వేస్తున్నట్లు రైల్వే అధికారులు ఒక ప్రకటనలో తెలిపారు. రైల్వేట్రాక్‌ మరమ్మతుల కారణంగా ఈ నెల 19, 20, 21 తేదీల్లో గేటు పనులు జరుగుతాయన్నారు. వాహనదారులు ఈ విషయాన్ని గ్రహించి, సహకరించాలని తెలిపారు. సమాచారం తెలియక పాఠశాలలు, కళాశాలలకు వెళ్లే విద్యార్థులు ఇబ్బంది పడ్డారు.