ఉపాధి హామీ పనులపై వివాదం

గోవాడ మాజీ సర్పంచితో కూలీల వాగ్వాదం

మాజీ సర్పంచి ఏడువాక లక్ష్మణకుమార్, ఇరువర్గాల వారితో మాట్లాడుతున్న సీఐ శ్రీనివాసరావు

చోడవరం గ్రామీణం, న్యూస్‌టుడే: గోవాడ గ్రామంలో ఉపాధి హామీ పనుల్లో అవకతవకలు జరిగాయంటూ ఇచ్చిన ఫిర్యాదు ఇరువర్గాల మధ్య వివాదాన్ని రేపింది. కూలీలు పనులకు రాకుండానే దొంగ మస్తర్లు వేస్తున్నారని మాజీ సర్పంచి ఏడువాక లక్ష్మణకుమార్‌ అధికారులకు ఫిర్యాదు చేశారు. దీనిపై ఉపాధి హామీ సాంకేతిక సహాయకుడు మోద గ్రామానికి వచ్చి విచారణ చేపట్టారు. ఆదివారం పనులకు రావద్దని కూలీలకు చెప్పారు. దీంతో కూలీలంతా కొంతమంది నాయకులతో కలిసి మాజీ సర్పంచి ఇంటికి వెళ్లి నిలదీశారు. పనులు ఆపించారంటూ ఆగ్రహం వ్యక్తం చేశారు. గతంలో జరిగిన పనుల్లో పలు అవకతవకలు చోటుచేసుకున్నాయని, వీటిపై పూర్తిస్థాయిలో విచారణ చేయాలంటూ ఫిర్యాదు చేశామని లక్ష్మణకుమార్‌తోపాటు జనసేన జిల్లా ప్రధాన కార్యదర్శి అల్లం రామఅప్పారావు, ఏడువాక నూకరాజు, కరణం శేఖర్, బండి గోపి చెప్పారు. దీంతో మాటామాటా పెరిగి ఇరువర్గాల మధ్య తోపులాటకు దారితీసింది. లక్ష్మణకుమార్‌ పోలీసులకు సమాచారం ఇవ్వడంతో సీఐ శ్రీనివాసరావు, ఎస్సై సూర్యనారాయణ, సిబ్బంది అక్కడకు చేరుకొని సర్దిచెప్పారు. ఎన్నికల నేపథ్యంలో 144 సెక్షన్‌ అమలులో ఉందని, ఎటువంటి గొడవలకు దిగవద్దని కూలీలకు సూచించారు. గ్రామంలో ప్రస్తుతం పోలీసుల గస్తీ కొనసాగుతోంది. ఇరువర్గాల పరస్పర ఫిర్యాదుల మేరకు దర్యాప్తు చేస్తున్నట్లు సీఐ తెలిపారు.

గోవాడ పంచాయతీ కార్యాలయం వద్ద ఆందోళనకు దిగిన కూలీలు