Property purchase: ప్లాట్లు, ఇళ్లు అమ్మకానికి పెడితే.. ఒకటికి రెండుసార్లు ఆలోచించాల్సిందే!

అనుమతులు రాకుండానే బేరసారాలు
హెచ్‌ఎండీఏ, డీటీసీపీ పేరుతో దందా

ఈనాడు, హైదరాబాద్‌: ‘శివారులో మంచి లేఅవుట్‌ ఉంది.. హెచ్‌ఎండీఏ లేదా డీటీసీపీ అనుమతులు తీసుకున్నాం. తక్కువ ధరకే ఇస్తున్నాం..’ అని ఎవరైనా ప్లాట్లు లేదా ఇళ్లు అమ్మకానికి పెడితే ఒకటికి రెండుసార్లు ఆలోచించుకొని ముందుకెళ్లాలని నిపుణులు సూచిస్తున్నారు. లేఅవుట్‌ లేదా భవనాల నిర్మాణాలకు హెచ్‌ఎండీఏ, డీటీసీపీలకు దరఖాస్తు చేసుకొని ఇంకా అనుమతులు రాకముందే అందులో ప్లాట్లు, ఇళ్లను కొందరు అమ్మకానికి పెడుతున్నారు. ముఖ్యంగా శంషాబాద్, మేడ్చల్, శంకర్‌పల్లి జోన్లలో ఈ దందా ఎక్కువగా నడుస్తోంది. 

రంగారెడ్డి జిల్లా కొందుర్గులో 421 ఎకరాల్లో లేఅవుట్‌ ఉందని, డీటీసీపీ అనుమతులు కూడా తీసుకున్నట్లు అవతలి వ్యక్తులు చెప్పడంతో గుడ్డిగా నమ్మిన ఓ వ్యక్తి వారికి దాదాపు రూ.30 లక్షలపైనే సమర్పించుకున్నాడు. విషయం తెలిసి లబోదిబోమంటూ ఇటీవల  పోలీసులను ఆశ్రయించారు. 

ఇవి గమనించండి..

• హెచ్‌ఎండీఏ పరిధిలోని లేఅవుట్లకు, అయిదు అంతస్తులు అంతకుమించిన భవనాలకు హెచ్‌ఎండీఏ, జిల్లాల్లో డీటీసీపీ నుంచి అనుమతులు తీసుకోవాలి. హెచ్‌ఎండీఏ నుంచి ఎల్‌పీ నంబరు, డీటీసీపీ సంబంధించి  అనుమతుల వివరాలు క్షుణ్ణంగాపరిశీలించి ముందుకు వెళ్లాలి.
• ముఖ్యంగా లేఅవుట్లలో ప్లాట్లు కొనేముందే భూ యజమాని పూర్తి వివరాలు, లింకు డాక్యుమెంట్లు తప్పకుండా పరిశీలించాలి. మార్టిగేజ్‌ ప్లాట్లను అంటగట్టడానికి చాలామంది ప్రయత్నిస్తుంటారు. తక్కువకే ఇస్తామని చెబుతుంటారు. మార్టిగేజ్‌లో ఉన్న ప్లాట్లు రిజిస్ట్రేషన్‌ చేయడం కుదరదు సరికదా.. అందులో నిర్మాణాలకు ఎలాంటి అనుమతులు ఇవ్వరని గ్రహించాలి.
• కోర్టు కేసులు, ఎఫ్‌టీఎల్, బఫర్‌జోన్లలో ఉన్న ప్లాట్లు, ఇళ్లు ఎంత తక్కువకు విక్రయించాలని చూసినా సరే...వాటి జోలికి వెళ్లకపోవడమే మంచిది. లేఅవుట్‌ వేసిన తర్వాత అందులో మౌలికవసతుల కల్పన, మార్టిగేజ్‌ ప్లాట్లు ఉన్నాయా అనే వివరాలు తెలుసుకోవాలి.