జగ్‌దేవ్‌ అరెస్ట్‌

ప్రశాంత జగ్‌దేవ్‌ 

భువనేశ్వర్, న్యూస్‌టుడే: ఖుర్దా అసెంబ్లీ భాజపా ఎమ్మెల్యే అభ్యర్థి ప్రశాంత జగ్‌దేవ్‌ను శనివారం అర్ధరాత్రి 12 గంటలకు పోలీసులు అరెస్ట్‌ చేశారు. చిలికా అసెంబ్లీ సిటింగ్‌ ఎమ్మెల్యే జగ్‌దేవ్‌ ఈసారి ఖుర్దా అసెంబ్లీ స్థానానికి భాజపా తరఫున పోటీ చేశారు. శనివారం ఇక్కడ పోలింగ్‌ జరిగిన సంగతి తెలిసిందే. సాయంత్రం బెలగడ పోలింగ్‌ కేంద్రానికి వెళ్లిన జగ్‌దేవ్‌ ప్రిసైడింగ్‌ అధికారికి దుర్భాషలాడి వీరంగం సృష్టించినట్లు ఆరోపణలు రాగా, బిజద నేతలు ఎన్నికల సంఘానికి ఫిర్యాదు చేశారు. రాత్రి దీనిపై ప్రిసైడింగ్‌ అధికారి పోలీసులకు లిఖిత పూర్వకంగా ఫిర్యాదు చేయడంతో జగ్‌దేవ్‌ను అరెస్ట్‌ చేసినట్లు తెలిసింది.

బిజదపై చర్యలు తీసుకోవాలి

మూడోవిడత పోలింగ్‌లో బిజద నేతలు, కార్యకర్తలు కొందరు వీరంగం సృష్టించారని, వారిపై చర్యలు తీసుకోవాలని భాజపా నాయకత్వం ఎన్నికల అధికారికి ఫిర్యాదు చేసింది. పూరీ జిల్లాలోని బ్రహ్మగిరి, ఢెంకనాల్‌ జిల్లాలోని ఛెండిపద, కటక్‌ జిల్లా అఠాగఢ్‌ సెగ్మెంట్లలో పోటీ చేస్తున్న బిజద అభ్యర్థులు ఓటర్లను ప్రభావితం చేశారని, బెదిరించారని ఫిర్యాదులో పేర్కొన్నారు.