Milam Village: ఆరు దశాబ్దాల తర్వాత.. ఆ పల్లెలో మళ్లీ ‘జన’కళ!

పిథౌరాగఢ్‌: భారత్‌- చైనా 1962 యుద్ధం సమయంలో ఉత్తరాఖండ్‌లో అంతర్జాతీయ సరిహద్దు వెంబడి అనేక ప్రాంతాల ప్రజలు తప్పనిసరి పరిస్థితుల్లో ఇళ్లను వీడారు. అందులో పిథౌరాగఢ్‌ జోహార్‌ లోయలోని మిలం గ్రామం ఒకటి. ఆరు దశాబ్దాల తర్వాత ఈ ఊర్లో మళ్లీ జనసందోహం నెలకొంటోంది. కేంద్ర, రాష్ట్ర ప్రభుత్వాల ఆధ్వర్యంలో ‘వైబ్రంట్‌ విలేజ్‌’ కార్యక్రమంలో భాగంగా ఈ పల్లె రూపురేఖలు మారుతున్నాయి. 1962 తర్వాత ఇటీవల స్థానికంగా ఓ నూతన భవనం నిర్మితమైంది. పర్యాటకుల కోసం దాన్ని హోమ్‌స్టేగా మార్చారు.

కొన్ని పాత ఇళ్లకు మరమ్మతులు చేశారు. గ్రామానికి రోడ్లు, కమ్యూనికేషన్‌ సౌకర్యాలు మెరుగుపర్చుతున్నారు. సమీపంలోని 12 గ్రామాలకు విద్యుత్తు సదుపాయాన్ని అందించేందుకు రూ.20 కోట్ల వ్యయంతో ఓ ప్రాజెక్టుకు ఆమోదం లభించింది. మిలం హిమానీనదం, నందా దేవి ఆలయం, ట్రెక్కింగ్‌ ఇక్కడి పర్యాటక ఆకర్షణలు. 2024లో 1,280గా ఉన్న పర్యాటకుల సంఖ్య.. ఈ ఏడాది 3,200కు పెరిగింది. యుద్ధానికి ముందు 500 కుటుంబాలకు నిలయంగా ఉన్న ఈ గ్రామం.. పర్యాటకం, పునరావాసం ద్వారా కొత్త ఊపిరి పోసుకుంటోంది.

- ఈటీవీ భారత్‌