పార్కింగ్ వివాదం.. హోటల్ యజమానిపై చేయిచేసుకున్న నటుడు

కోల్‌కతా: బెంగాలీ నటుడు, తృణమూల్‌ కాంగ్రెస్ ఎమ్మెల్యే సోహమ్‌ చక్రవర్తి (Soham Chakraborty) కోల్‌కతాలోని ఒక రెస్టారంట్ యజమానిపై చేయిచేసుకున్నారు. పార్కింగ్ విషయంలో జరిగిన వాగ్వాదమే ఈ ఘటనకు దారితీసింది. దీనిపై ఇరువర్గాలు భిన్నమైన వాదన వినిపించాయి. జాతీయ మీడియా కథనాల ప్రకారం..

కోల్‌కతాలోని న్యూటౌన్ ప్రాంతంలోని తన రెస్టారంట్‌ పైభాగాన్ని షూటింగ్ నిమిత్తం సోహమ్‌కు ఇచ్చినట్లు యజమాని ఆలం తెలిపారు. ‘‘నా రెస్టారంట్‌పైన స్థలాన్ని షూటింగ్ నిమిత్తం ఆయనకు ఇచ్చాను. అందుకోసం నేను డబ్బు వసూలు చేయలేదు. ఆయన భద్రతా సిబ్బంది మా వినియోగదారులకు కేటాయించిన పార్కింగ్ ప్రాంతంలో వాహనాలను పార్క్ చేశారు. వాటిని అక్కడ పార్క్‌ చేయొద్దని మా సిబ్బంది చెప్పారు. సోహమ్ ఒక ఎమ్మెల్యే అని, అభిషేక్ బెనర్జీకి సన్నిహితుడని వారు చెప్పారు. ఆయన ఎవరైనా నాకు సంబంధం లేదని నేను బదులిచ్చాను. ఆ వెంటనే సోహమ్ వచ్చి, నా ముఖంపై కొట్టాడు..తన్నాడు’’ అని ఆలం ఆరోపించారు.

హోటల్ యజమానిని కొట్టినట్లు తృణమూల్ ఎమ్మెల్యే అంగీకరించాడు. ‘‘పెద్దగా కేకలు వినిపించడంతో నేను వెంటనే కిందికి వచ్చాను. ఆ యజమాని నా సిబ్బందిని తిట్టడం కనిపించింది. అభిషేక్ బెనర్జీని కూడా నిందించాడు. దాంతో సహనం కోల్పోయిన నేను చెంపదెబ్బ కొట్టాను’’ అని సోహమ్ వెల్లడించారు. వారిద్దరి మధ్య వాగ్వాదానికి సంబంధించిన సీసీటీవీ దృశ్యాలు వెలుగులోకి వచ్చాయి. ఈ ఘటనపై ఎలాంటి ఫిర్యాదు ఇవ్వలేదని హోటల్ మేనేజర్ తెలిపారు.