Prashant Kishor: కుల రాజకీయాలకు అతీతంగా ఉంటేనే బిహార్‌ అభివృద్ధి - ప్రశాంత్‌ కిశోర్‌

ఇంటర్నెట్‌ డెస్క్‌: బిహార్‌లో అసెంబ్లీ ఎన్నికల తొలిదశకు గడువు సమీపిస్తున్న వేళ రాజకీయ పార్టీలు ప్రచారాన్ని మరింత ముమ్మరం చేశాయి. ఈ క్రమంలో జన్‌ సురాజ్‌ పార్టీ వ్యవస్థాపకుడు ప్రశాంత్‌ కిశోర్‌ (Prashant Kishor) మాట్లాడుతూ.. కుల రాజకీయాలకు అతీతంగా ఓట్లు వేసినప్పుడే రాష్ట్రం అభివృద్ధి చెందుతుందని వ్యాఖ్యానించారు. నీతీశ్‌ ప్రభుత్వంలో అవినీతి నేతలు ఉన్నారని, అశోక్‌ చౌధరీ అత్యంత అవినీతి పరుడని ఆరోపించారు.

అయితే 150.. లేదంటే 10 సీట్లు: ప్రశాంత్‌ కిశోర్‌

‘‘నీతీశ్‌ ప్రభుత్వంలో అత్యంత అవినీతిపరుడు అశోక్‌ చౌధరీ. ఆయన జేడీయూలో ఉన్నారు. తండ్రిది కాంగ్రెస్‌ పార్టీ. కుమార్తె ఎల్‌జేపీ (రామ్‌ విలాస్‌).. ఆయన అన్ని పార్టీలకు చెందిన నేత. ఆయన అవినీతిని బయటపెట్టాగానే పరువు నష్టం దావా వేస్తానని నాపై బెదిరింపులకు దిగారు. పది రోజుల తర్వాత ఆయన భయపడి.. ప్రజాకోర్టులో తేల్చుకుంటానని చెప్పారు. బిహార్‌ నుంచి రూ.500-1000కోట్లు లూటీ చేసిన ఆయన.. ఇప్పుడు డబ్బులు పంచుతున్నారు’’ అని జేడీయూ సీనియర్‌ నేతపై ప్రశాంత్‌ కిశోర్‌ తీవ్ర ఆరోపణలు చేశారు. షేక్‌పురాలో ప్రచారం నిర్వహించిన ఆయన అధికార ప్రభుత్వంపై నిప్పులు చెరిగారు.

బిహార్‌లో 243 అసెంబ్లీ స్థానాలకు ఎన్నికలు రెండు దశల్లో జరగనుండగా.. తొలి దశ పోలింగ్‌ నవంబర్‌ 6న జరగనుంది. నవంబర్‌ 11న రెండో దశ.. నవంబర్‌ 14వ తేదీన ఓట్ల లెక్కింపు చేపట్టనున్నారు.