Rajasthan: పశువుల సంతలో మృతి చెందిన రూ.21 కోట్ల విలువైన గేదె

ఇంటర్నెట్‌ డెస్క్‌: రూ.21 కోట్ల విలువైన గేదె (Buffalo Worth Rs.21 Crore) పశువుల సంతలో ప్రాణాలు కోల్పోయిన ఘటన ఆలస్యంగా వెలుగులోకి వచ్చింది. రాజస్థాన్‌లో అక్టోబర్‌ 30వ తేదీ నుంచి నవంబర్‌ 5 వరకు వారం రోజుల పాటు ప్రసిద్ధ పుష్కర్ పశువుల సంతలో వివిధ జంతువుల ప్రదర్శన (Pushkar Animal Fair)ను ఏర్పాటు చేశారు. అందులో భాగంగానే శుక్రవారం పుష్కర్ పశువుల సంతలో కోట్ల రూపాయల విలువైన గేదెలు, గుర్రాలను వాటి యజమానులు తీసుకువచ్చారు. సంత జరుగుతున్న సమయంలో రూ.21కోట్ల విలువైన ఓ గేదె అకస్మాత్తుగా కిందపడిపోయింది. దీంతో సంత యాజమాన్యం పశువైద్యులకు సమాచారం అందించింది. ఘటనా స్థలానికి చేరుకున్న వైద్యులు అత్యవసర చికిత్స అందించినప్పటికీ గేదె మృతిచెందింది. 

ఈ విషయాన్ని ఓ జంతు సంరక్షణ సంస్థ సోషల్ మీడియాలో పోస్టు చేయడంతో వైరల్‌గా మారింది. గేదె బలంగా, లావుగా కనిపించడానికి, వ్యాపార లాభాల కోసం దాని యజమానులు వివిధ రకాల ఉత్ర్పేరకాలను ఇంజెక్షన్‌ల రూపంలో ఇస్తుండడం వల్ల ఆరోగ్యం క్షీణించి గేదె మరణించినట్లు ఆ సంస్థ పేర్కొంది. దీంతో జంతువుల సంరక్షణపై నెటిజన్లు ఆందోళన వ్యక్తం చేస్తున్నారు.