మణిపుర్‌ హింసకు కారణమైన హైకోర్టు ఉత్తర్వు వెనక్కి

ఇంఫాల్‌: మణిపుర్‌ హింసకు ఆజ్యం పోసిన కీలక ఉత్తర్వులను హైకోర్టు వెనక్కి తీసుకుంది. మార్చి 27, 2023న ఇచ్చిన తీర్పులో మెజారిటీ మైతేయ్‌ వర్గాన్ని ఎస్టీ జాబితాలోకి చేర్చే అంశాన్ని వేగంగా పరిశీలించాలని, దీనిపై 4 వారాల్లో రాష్ట్ర ప్రభుత్వం నిర్ణయం తీసుకోవాలని పేర్కొంది. దీంతో మైనారిటీ కుకీలు భగ్గుమన్నారు. హింస చెలరేగింది. ఈ మారణకాండలో దాదాపు 200 మందికి పైగా ప్రాణాలు కోల్పోయారు. ఇప్పటికీ ఆ రాష్ట్రం రావణకాష్టంలా రగులుతూనే ఉంది. బుధవారం వెలువరించిన తీర్పులో మైతేయ్‌లను ఎస్టీల్లోకి చేర్చాలన్న పేరాను న్యాయస్థానం తొలగించింది. ఎస్టీ జాబితాను సవరణ లేదా మార్చడానికి సుప్రీంకోర్టుకు అధికారం లేదని ‘స్టేట్‌ ఆఫ్‌ మహారాష్ట్ర వర్సెస్‌ మిలింద్‌’ కేసులో సర్వోన్నత న్యాయస్థానం స్పష్టంగా ఇచ్చిన తీర్పునకు ఈ పేరా వ్యతిరేకంగా ఉందని పేర్కొంది. మైతేయ్‌లు కూడా తమ సమీక్ష పిటిషన్‌లో తమను ఎస్టీల్లోకి చేర్చాలా లేదా అన్న విషయం రాష్ట్ర ప్రభుత్వానికే వదిలేస్తున్నామని తెలిపారు.