ప్లాస్టిక్‌ వ్యర్థాలతో సీసీ రోడ్డు

మహారాష్ట్ర కళాశాల పరిశోధనకు పేటెంట్‌

పర్యావరణానికి గొడ్డలిపెట్టుగా మారిన ప్లాస్టిక్‌ వ్యర్థాలతో  మహారాష్ట్రలోని అమరావతి ప్రాంత రామ్‌మేఘ ఇంజినీరింగ్‌ కళాశాల పరిశోధకులు సీసీ రోడ్లు నిర్మించారు. తక్కువ ఖర్చుతో ఎక్కువకాలం మన్నిక ఉండేలా రూపొందిన ఈ పరిశోధనకు భారత ప్రభుత్వం నుంచి పేటెంటు హక్కు లభించింది. స్థానిక ఇన్నోవేటివ్‌ ఎంటర్‌ప్రెన్యూర్‌ బోర్డు భాగస్వామ్యంతో ఈ పరిశోధన చేశారు. ఈ రకమైన పరిశోధన ఆఫ్రికాలో 2005లోనే జరిగింది. దీని ఆధారంగా ఐఐటీ ఖరగ్‌పుర్‌ 2010-12 మధ్యకాలంలో ఇలాంటి పరిశోధనలు చేపట్టింది. రామ్‌మేఘ ఇంజినీరింగ్‌ కళాశాల పరిశోధక బృందం ఇదే పద్ధతిని మరింత అభివృద్ధి చేసింది. కళాశాల ప్రొఫెసర్‌ శ్రీకాంత్‌ హర్లే ఈ ప్రాజెక్టుకు నేతృత్వం వహించారు. ప్లాస్టిక్‌ వ్యర్థాలతో సెల్స్‌ ఆకారంలో తయారుచేసి, సీసీ రోడ్డు నిర్మాణంలో వాడారు. ‘‘తారు రోడ్డుతో పోలిస్తే ఈ రోడ్డు నిర్మాణవ్యయం 20 శాతం తక్కువ. దాదాపు 20 ఏళ్లపాటు చెక్కుచెదరకుండా ఉంటుంది. ఈ పద్ధతిలో గ్రామీణ ప్రాంతాల్లో రోడ్లు నిర్మించాలని కేంద్ర ప్రభుత్వాన్ని కోరనున్నాం’’ అని ప్రొఫెసర్‌ శ్రీకాంత్‌ వెల్లడించారు.  - ఈటీవీ భారత్‌