ప్రజలింకా మంత్రగాళ్లను ఆశ్రయిస్తున్నారు

ఇదో దురదృష్టకర వాస్తవం: బొంబాయి హైకోర్టు

ముంబయి: తమ సమస్యల పరిష్కారం కోసం ప్రస్తుత ఆధునిక కాలంలోనూ ప్రజలు.. మంత్రగాళ్లను, బాబాలను ఆశ్రయిస్తున్నారని, ఇదో దురదృష్టకర వాస్తవమని బొంబాయి హైకోర్టు పేర్కొంది. మేధో వైకల్యం ఉన్న ఆరుగురి బాలికలపై లైంగిక దాడి చేసిన ఓ మంత్రగాడికి ట్రయల్‌ కోర్టు విధించిన యావజ్జీవ కారాగార శిక్షను ఖరారు చేస్తూ.. న్యాయస్థానం ఈ వ్యాఖ్యలు చేసింది. ‘‘ప్రస్తుత కాలంలోనూ.. అంధ విశ్వాసాలు ఏ స్థాయిలో ఉన్నాయో తెలిపే కేసిది. ఇంకా కొంత మంది తమ సమస్యల పరిష్కారం కోసం మంత్రగాళ్ల తలుపులు తడుతున్నారు. ఇలాంటి వారి విశ్వాసాలను బలహీనతలను ఉపయోగించుకొని బాబాలు, మంత్రగాళ్లు దోపిడీ చేస్తున్నారు’’ అని తెలిపింది.