నేపాల్‌ మేయర్‌ కుమార్తె ఆచూకీ లభ్యం

పణజీ: గోవాలో రెండ్రోజుల క్రితం అదృశ్యమైన నేపాల్‌లోని ధన్‌గఢీ నగర మేయర్‌ కుమార్తె ఆర్తీ హమాల్‌(36) ఆచూకీ బుధవారం లభ్యమైంది. ఉత్తర గోవాలోని ఓ హోటల్లో తన ఇద్దరు స్నేహితురాళ్లతో ఆమె కనిపించినట్లు పోలీసులు తెలిపారు. ధ్యాన సాధన చేసేందుకు ఆర్తీ నెల రోజుల క్రితం ఉత్తర గోవాలోని మాండ్రెంలో ఉన్న ఓషో ధ్యాన కేంద్రానికి వచ్చారు. ఈ నెల 25 నుంచి ఆమె కనిపించకుండా పోవడతో కలకలం రేగింది. ఆమె తల్లిదండ్రులు నేపాల్‌ నుంచి గోవాకు చేరుకున్నారు. కేసు నమోదు చేసుకున్న గోవా పోలీసులు విస్తృత గాలింపు చేపట్టారు. ‘ఆర్తీ తన మొబైల్‌ ఫోన్‌ను ధ్యాన కేంద్రంలోనే ఉంచారు. దీంతో సాంకేతికతను ఉపయోగించి ఆమె జాడ కనిపెట్టడం సాధ్యం కాలేదు. రాష్ట్ర వ్యాప్తంగా ఉన్న అన్నీ హోటల్లలో ఆమె కోసం వెతికాం. ఉత్తర గోవాలోని చోప్డం గ్రామంలోని ఓ హోటల్లో తన ఇద్దరు స్నేహితురాళ్లతో కనిపించించారు’ అని పోలీసులు వివరించారు.