మహువా, హీరానందానీలకు మళ్లీ ఈడీ సమన్లు

 నేడు విచారణకు హాజరుకావాలని ఆదేశం

దిల్లీ: విదేశీ మారక ద్రవ్య నిర్వహణ చట్టం (ఫెమా) ఉల్లంఘన కేసులో టీఎంసీ నేత మహువా మొయిత్రా, దుబాయ్‌ వ్యాపారవేత్త దర్శన్‌ హీరానందానీలకు బుధవారం ఎన్‌ఫోర్స్‌మెంట్‌ డైరెక్టరేట్‌ (ఈడీ) మళ్లీ సమన్లు జారీ చేసింది. గురువారం దిల్లీలోని ఈడీ కార్యాలయంలో హాజరుకావాలని సూచించినట్లు అధికార వర్గాలు వెల్లడించాయి. ప్రశ్నలడిగేందుకు డబ్బులు తీసుకున్నారనే ఆరోపణలతో ఆమెను లోక్‌సభ నుంచి బహిష్కరించిన విషయం తెలిసిందే. ఇదివరకు రెండుసార్లు ఈడీ నోటీసులిచ్చినా అధికారిక పనులున్నాయంటూ ఆమె గైర్హాజరయ్యారు. దీంతో తాజా నోటీసు జారీ అయింది. మొయిత్రా విషయంలో బుధవారం ఒక న్యాయవాదిని ఈడీ ప్రశ్నించి కొన్ని వివరాలు రాబట్టింది. హీరానందానీపై మరో ఫెమా కేసులోనూ సమన్లు జారీ అయ్యాయి. ప్రతీకార రాజకీయాల్లో భాగంగానే కేంద్రం ఈడీ ద్వారా మహువాకు సమన్లు ఇచ్చిందని తృణమూల్‌ కాంగ్రెస్‌ ఆరోపించింది. ఎన్నికల ముందు దర్యాప్తు సంస్థల్ని దుర్వినియోగం చేస్తున్నారని విమర్శించింది.