నా భర్త అనుమానాస్పద మృతిపై దర్యాప్తు జరగాలి: సీతా సోరెన్‌

రాంచీ: ఝార్ఖండ్‌ ముక్తి మోర్చా (జేఎంఎం) అధినేత శిబు సోరెన్‌ కుటుంబానికి మరో ఎదురుదెబ్బ తగిలింది. ఆయన పెద్ద కోడలైన సీత తన భర్త దుర్గా సోరెన్‌ అనుమానాస్పద మరణంపై ఉన్నతస్థాయి దర్యాప్తు జరగాలని గురువారం డిమాండ్‌ చేశారు. ఝార్ఖండ్‌లో అధికారంలో ఉన్న జేఎంఎం తనను నిర్లక్ష్యం చేస్తోందంటూ ఈమె ఇటీవల భాజపాలో చేరారు. జైలులో ఉన్న మాజీ సీఎం హేమంత్‌ సోరెన్‌ భార్య కల్పన తనను అవమానించినట్లు కూడా సీత ఆరోపణలు చేశారు. ‘‘రాష్ట్రంలో జేఎంఎం పటిష్ఠతకు అహరహం శ్రమించిన నా భర్త దుర్గా సోరెన్‌ అనుమానాస్పద పరిస్థితుల్లో మరణించారు. కాబట్టే, దర్యాప్తు కోరుతున్నా’’ అని మీడియా సమావేశంలో ఆమె తెలిపారు. రాష్ట్రంలోని దుమ్కా లోక్‌సభ స్థానం నుంచి సీతా సోరెన్‌ భాజపా అభ్యర్థిగా పోటీ చేస్తున్నారు.