సునీతా కేజ్రీవాల్‌ను కలిసిన హేమంత్‌ సోరెన్‌ భార్య

దిల్లీ: మద్యం కుంభకోణం కేసులో అరెస్టైన దిల్లీ సీఎం అరవింద్‌ కేజ్రీవాల్‌ వెనక ఝార్ఖండ్‌ మొత్తం నిలిచి ఉందని జేఎంఎం అధినేత, ఝార్ఖండ్‌ మాజీ సీఎం హేమంత్‌ సోరెన్‌ భార్య కల్పనా సోరెన్‌ పేర్కొన్నారు. శనివారం ఆమె అరవింద్‌ కేజ్రీవాల్‌ భార్య సునీతా కేజ్రీవాల్‌ను కలసి సంఘీభావం తెలిపారు. ‘‘ఝార్ఖండ్‌లో రెండు నెలల క్రితం ఏం జరిగిందో దిల్లీలోనూ అదే జరిగింది. నా భర్త హేమంత్‌ సోరెన్‌ను జైలుకు పంపారు. ఇక్కడ అరవింద్‌ కేజ్రీవాల్‌ను పంపారు. సునీతా కేజ్రీవాల్‌ బాధను పంచుకోవడానికి నేనిక్కడకు వచ్చాను. ఈ పోరాటాన్ని మరింత ముందుకు తీసుకెళ్లాలని ఇద్దరం నిశ్చయించుకున్నాం’’ అని సమావేశానంతరం విలేకరులతో కల్పనా సోరెన్‌ తెలిపారు.