చెవిటి, మూగ నిందితుల విచారణకు మార్గదర్శకాల జారీని పరిశీలిస్తాం: సుప్రీం

దిల్లీ: చెవిటి, మూగ నిందితుల విచారణ కోసం మార్గదర్శకాల జారీ అంశాన్ని పరిశీలించాలని సర్వోన్నత న్యాయస్థానం నిర్ణయించింది. అత్యాచారం వంటి ఘోరమైన నేరాలకు పాల్పడేందుకు వైద్యపరంగా శారీరక సామర్థ్యం గలిగిన నిందితులనూ ఈ విషయంలో పరిగణనలోకి తీసుకుంటారు. ఇటువంటి మార్గదర్శకాలను ఇప్పటి వరకూ జారీ చేయలేదనే అంశాన్ని న్యాయమూర్తులు జస్టిస్‌ సూర్యకాంత, జస్టిస్‌ కె.వి.విశ్వనాథన్‌లతో కూడిన సుప్రీంకోర్టు ధర్మాసనం గుర్తించింది. ఇద్దరు మైనర్‌ బాలికలపై అత్యాచారానికి పాల్పడిన ఓ మూగ వ్యక్తికి బెయిల్‌ నిరాకరించిన సందర్భంగా మార్గదర్శకాల అంశం బెంచ్‌ దృష్టికి వచ్చింది.