యోగాగురు రాందేవ్‌ కేసుల పరిస్థితేంటి?

వివరాలు సమర్పించాలని బిహార్‌, ఛత్తీస్‌గఢ్‌లకు సుప్రీం ఆదేశం

దిల్లీ: యోగాగురు రాందేవ్‌పై నమోదైన ఫిర్యాదుల పరిస్థితిని, ఎఫ్‌ఐఆర్‌ వివరాలను సమర్పించాలని బిహార్‌, ఛత్తీస్‌గఢ్‌ ప్రభుత్వాలను సుప్రీంకోర్టు ఆదేశించింది. అల్లోపతి వైద్యానికి వ్యతిరేకంగా రాందేవ్‌ చేసిన వ్యాఖ్యలపై ఇండియన్‌ మెడికల్‌ అసోసియేషన్‌కు చెందిన పట్నా, రాయ్‌పుర్‌ శాఖలు 2021లో ఫిర్యాదు చేశాయి. ఇలా వివిధ రాష్ట్రాల్లో నమోదైన ఎఫ్‌ఐఆర్‌లన్నింటిని కలపాలని కోరుతూ రాందేవ్‌ పిటిషన్‌ వేశారు. దీనిపై శుక్రవారం విచారణ జరిపిన సుప్రీంకోర్టు ఈ కేసులో ఫిర్యాదుదారులందరినీ ఇంప్లీడ్‌ చేయాలని పేర్కొంది.

మరో కేసులో పతంజలి యోగపీఠ్‌ ట్రస్ట్‌కు ఎదురుదెబ్బ తగిలింది. యోగా శిబిరాల్లో ప్రవేశానికి రుసుం తీసుకున్నందుకు సర్వీసు పన్ను కట్టాలని కస్టమ్స్‌, ఎక్సైజ్‌, సర్వీసు ట్యాక్స్‌ అప్పిలేట్‌ ట్రైబ్యునల్‌ ఇచ్చిన తీర్పులో జోక్యం చేసుకోబోమని శుక్రవారం సుప్రీంకోర్టు పేర్కొంది. ట్రస్ట్‌ పిటిషన్‌ను కొట్టివేసింది.