12 ఏళ్ల లోపు పిల్లలకు తల్లిదండ్రుల దగ్గరే సీట్లు

విమానయాన సంస్థలకు డీజీసీఏ ఆదేశం

దిల్లీ: విమానయాన సంస్థలకు  పౌర విమానయాన శాఖ డైరెక్టరేట్‌ జనరల్‌ (డీజీసీఏ) కీలక ఆదేశాలు జారీ చేసింది. 12 ఏళ్లలోపు పిల్లలకు వారి తల్లిదండ్రుల్లో కనీసం ఎవరో ఒకరి పక్కన సీటు కేటాయించాలని పేర్కొంది. పిల్లలు తమ తల్లిదండ్రులు లేదా సంరక్షకులతో కలిసి విమానాల్లో ప్రయాణించే సందర్భాల్లో చాలాసార్లు తమ పెద్ద వాళ్లకు దూరంగా కూర్చోవాల్సి వస్తోంది. దీనిపై డీజీసీఏకు అనేక ఫిర్యాదులు వచ్చాయి. వీటిని పరిశీలించిన డీజీసీఏ, తల్లిదండ్రులు ఇద్దరిలో కనీసం ఎవరో ఒకరి వద్ద కూర్చునే అవకాశం కల్పిస్తే.. వారి ప్రయాణం సజావుగా జరుగుతుందని భావించి ఈ నిర్ణయం తీసుకుంది. పిల్లలకు తల్లిదండ్రులు ఇద్దరిలో ఎవరో ఒకరి పక్కన సీటును కేటాయిస్తే ఆ విషయాన్ని తప్పకుండా ప్రయాణ రికార్డుల్లో నమోదు చేయాలని కూడా సూచించింది.