పెరుగుతున్న జీవక్రియ వ్యాధులు

దిల్లీ: మధుమేహం, అధిక రక్తపోటు, నడుం చుట్టూ కొవ్వు పెరగడం వంటి జీవక్రియ సంబంధ వ్యాధులు పెరుగుతున్నాయని లాన్సెట్‌ వైద్య విజ్ఞాన పత్రికలో ప్రచురితమైన పరిశోధనా వ్యాసం హెచ్చరించింది. జనాభాలో వృద్ధుల సంఖ్య పెరగడం, జీవన శైలి మారడం వల్ల ఈ తరహా వ్యాధులు ప్రబలుతున్నాయి. 2000-2021 మధ్య కాలంలో జీవక్రియ సంబంధ వ్యాధుల వల్ల అనారోగ్యం పాలై త్వరగా మరణాల పాలవడం వంటివి 50 శాతం పెరిగాయని లాన్సెట్‌ నివేదిక వెల్లడించింది.  15-49 ఏళ్ల వయో వర్గంలోని వారిలో మధుమేహం, నడుం చుట్టూ కొవ్వు పెరుగుతోందని తెలిపింది. ఈ వర్గంలో చెడు కొలస్ట్రాల్, అధిక రక్తపోటు కూడా అధికమవుతున్నాయి. మారుతున్న జీవన శైలులూ ఈ రుగ్మతలను పెంచుతున్నాయి. వాయు కాలుష్యం, ధూమపానం, తక్కువ బరువుతో పుట్టడం కూడా 2000-2021 మధ్య పెరిగాయి. తల్లీ పిల్లల పోషకాహార లోపం దక్షిణాసియా, ఆగ్నేయాసియా, తూర్పు ఆసియా,సహారా ఎడారి దిగువ దేశాలలో ఎక్కువగా ఉంది. మాతాశిశువుల ఆరోగ్యంపై శ్రద్ధ వహించడం, శుభ్రమైన తాగునీరు, పారిశుద్ధ్యం కల్పించడం వల్ల వ్యాధుల పీడ తగ్గుతుందని రుజువైంది.