అభిజిత్‌ గంగోపాధ్యాయకు ఈసీ షోకాజ్‌ నోటీసులు

దిల్లీ: కోల్‌కతా హైకోర్టు మాజీ న్యాయమూర్తి, భాజపా లోక్‌సభ అభ్యర్థి అభిజిత్‌ గంగోపాధ్యాయకు ఎన్నికల సంఘం షోకాజ్‌ నోటీసులను జారీ చేసింది. పశ్చిమబెంగాల్‌ రాష్ట్రం హల్దియాలో ఈ నెల 15న జరిగిన బహిరంగ సభలో బెంగాల్‌ సీఎం మమతా బెనర్జీపై అనుచిత వ్యాఖ్యలు చేయడమే అందుకు కారణం. ఆ వ్యాఖ్యలపై తృణముల్‌ కాంగ్రెస్‌ నాయకులు ఎన్నికల సంఘానికి ఫిర్యాదు చేశారు. దీనిపై స్పందించిన ఈసీ.. శుక్రవారం ఆయనకు షోకాజ్‌ నోటీసులు జారీ చేసింది. ఎన్నికల ప్రవర్తనా నియమావళిని ఉల్లంఘించారనీ, దీనిపై ఈ నెల 20లోపు వివరణ ఇవ్వాలని ఆదేశించింది. మే 25న పోలింగ్‌ జరగనున్న తమ్లుక్‌ నియోజకవర్గం నుంచి ఆయన భాజపా అభ్యర్థిగా బరిలోకి దిగారు.