సభలో అనారోగ్యంతో కుప్పకూలిన వ్యక్తి.. ప్రసంగాన్ని ఆపి చికిత్సకు ఆదేశించిన మమత

బిష్ణుపుర్‌: పశ్చిమ బెంగాల్లోని బంకుర జిల్లాలో శనివారం నిర్వహించిన ఎన్నికల సభలో టీఎంసీ ఛైర్‌పర్సన్, ముఖ్యమంత్రి మమతా బెనర్జీ ప్రసంగిస్తుండగా ఓ వ్యక్తి కుప్పకూలిపోయారు. వేసవి ఎండ తీవ్రత, ఉక్కపోతతో అతను అనారోగ్యానికి గురయ్యారు. సభలో ఒక్కసారిగా కలకలం రేగడం గమనించిన మమతా బెనర్జీ తన ఉపన్యాసాన్ని వెంటనే నిలిపివేశారు. విషయం తెలుసుకుని ఆ వ్యక్తికి వెంటనే సపర్యలు చేయాలని కార్యకర్తలకు ఆదేశించారు. ‘అతని ముఖంపై నీళ్లు చిలకరించండి. అంబులెన్స్‌ను సిద్దంచేసి సమీపంలోని ఆస్పత్రికి తీసుకెళ్లండి’ అని ఆమె సూచించారు. ఆ వ్యక్తి కోలుకునే వరకూ మమత ఓపిగ్గా వేసి చూశారు. ఓపిక తెచ్చుకున్న అతను పైకిలేవడంతో అంబులెన్స్‌లో జాగ్రత్తగా ఇంటికి చేర్చాలని సూచించి ఆమె తన ప్రసంగాన్ని తిరిగి ప్రారంభించారు.