ఫుడ్‌ అండ్‌ న్యూట్రిషన్‌ బోర్డు మూసివేత

ఈనాడు, దిల్లీ: కేంద్ర మహిళా, శిశు సంక్షేమ శాఖ ఆధ్వర్యంలో నడుస్తున్న ఫుడ్‌ అండ్‌ న్యూట్రిషన్‌ బోర్డును కేంద్ర ప్రభుత్వం మూసేసింది. గత ఏడాది ఏప్రిల్‌ 6న జరిగిన కేబినెట్‌లో తీసుకున్న నిర్ణయం మేరకు ఈ సంస్థను మూసేస్తున్నట్లు మంగళవారం విడుదల చేసిన నోటిఫికేషన్‌లో పేర్కొంది. ఈ సంస్థ 1964లో కేంద్ర వ్యవసాయశాఖ ఆధ్వర్యంలో ప్రారంభంకాగా, 1993లో దీన్ని మహిళా శిశుసంక్షేమ శాఖ పరిధిలోకి మార్చారు. దీనికింద ఇప్పటివరకు ఫరీదాబాద్, ముంబయి, కోల్‌కతా, చెన్నైల్లో ప్రాంతీయ నాణ్యతా నియంత్రణ ప్రయోగశాలలు, అలాగే 30 రాష్ట్రాలు/కేంద్రపాలిత ప్రాంతాల్లో కమ్యూనిటీ ఫుడ్‌ అండ్‌ న్యూట్రిషన్‌ ఎక్స్‌టెన్షన్‌ యూనిట్లు(సీఎఫ్‌ఎన్‌ఈయూ) పనిచేశాయి. కేంద్ర ప్రభుత్వ రంగ సంస్థలను హేతుబద్ధీకరించాలని కేంద్ర ప్రభుత్వ ప్రధాన ఆర్థిక సలహాదారు 2020 నవంబర్‌లో చేసిన సిఫార్సులను దృష్టిలో ఉంచుకొని ప్రభుత్వం ఈ బోర్డును మూసేయాలని నిర్ణయించింది. ఇందులో పనిచేస్తున్న 147 మంది ఉద్యోగుల్లో 33 మందికి స్వచ్ఛంద పదవీ విరమణకు అవకాశం కల్పించింది. మిగిలిన వారిని మహిళా, శిశు సంక్షేమ శాఖలోని వివిధ విభాగాలకు పంపింది.