నిందితుడి రక్త నమూనా నివేదికను మార్చేసిన వైద్యులు

పుణె కారు ప్రమాదం కేసులో అవినీతి కోణం 

పుణె: మహారాష్ట్రలోని పుణెలో మైనర్‌ దురుసు డ్రైవింగ్‌ కారణంగా ఇద్దరు టెకీలు మృతి చెందిన కేసులో అవినీతి కోణం వెలుగులోకి వచ్చింది. ఈ కేసులో ప్రధాన నిందితుడైన మైనర్‌ రక్త నమూనా పరీక్ష నివేదికను డబ్బులకు ఆశపడి ఇద్దరు వైద్యులు మార్చేసినట్లు దర్యాప్తు అధికారులు సోమవారం గుర్తించారు. రక్త పరీక్షల సమయంలో మైనర్‌ నమూనాలను చెత్తబుట్టలో పారేసి.. మరో వ్యక్తి నమూనాలను పెట్టినట్లు పోలీసులు తెలిపారు.  సాసూన్‌ ఆసుపత్రి ఫోరెన్సిక్‌ మెడిసిన్‌ విభాగం అధిపతి డాక్టర్‌ అజయ్‌ తావ్‌రే, ఆసుపత్రి ముఖ్య వైద్యాధికారి డాక్టర్‌ శ్రీహరి హల్నోర్‌ ఈ దారుణానికి పాల్పడినట్లు తెలిపిన పుణె క్రైం బ్రాంచ్‌ పోలీసులు.. వారిని అరెస్టు చేశారు. వీరితో పాటు డాక్టర్‌ తావ్‌రే దగ్గర పనిచేసే అతుల్‌ ఘట్కాంబ్లే అనే వ్యక్తిని అదుపులోకి తీసుకున్నారు. కోర్టు వారికి ఈనెల 30 వరకు రిమాండు విధించింది.