నీటిని వృథా చేస్తే రూ.2,000 జరిమానా

దిల్లీ సర్కారు నిర్ణయం

దిల్లీ: దేశ రాజధాని నగరంలో ఎండల తీవ్రత రోజురోజుకి పెరిగిపోతుండటంతో తాగునీటి కొరత తలెత్తకుండా దిల్లీ ప్రభుత్వం చర్యలు చేపట్టింది. ఎవరైనా నీటిని వృథా చేస్తే రూ.2,000 జరిమానా విధించనున్నట్లు బుధవారం మంత్రి అతిశీ ప్రకటించారు. పైపులతో కార్లను కడగడం, వాటర్‌ ట్యాంకులు ఓవర్‌ ఫ్లో కావడం, వాడుక నీటిని నిర్మాణ, వాణిజ్యపరమైన అవసరాల కోసం వినియోగించడం వంటి చర్యలపై కఠినంగా వ్యవహరించాలని అధికారుల్ని ఆదేశించారు. ఇందుకోసం దిల్లీ వ్యాప్తంగా 200 బృందాలను తక్షణమే ఏర్పాటు చేయాలని దిల్లీ జల్‌బోర్డు సీఈవోకు రాసిన లేఖలో ఆమె పేర్కొన్నారు. హరియాణా నుంచి హక్కుగా తమకు రావాల్సిన యమునా నది నీటి విడుదల ఆలస్యం అవుతుండటంతో దిల్లీ ప్రజలకు ఇబ్బందిగా మారుతోందన్నారు. ఇదే పరిస్థితి కొనసాగితే తాగునీటి విడుదలపై సుప్రీం కోర్టును ఆశ్రయిస్తామని ఆమె స్పష్టం చేశారు.