మొక్కలు నాటే కార్యక్రమాన్ని ప్రారంభించిన ప్రధాని

దిల్లీ: ప్రపంచ పర్యావరణ దినోత్సవాన్ని పురస్కరించుకొని ప్రధానమంత్రి నరేంద్ర మోదీ బుధవారం మొక్కలు నాటే కార్యక్రమాన్ని ప్రారంభించారు. దీనిలో భాగంగా దిల్లీలోని బుద్ధ జయంతి పార్క్‌లో ఆయన ఓ మొక్కను నాటారు. ప్రతి ఒక్కరూ తమ తల్లి పేరు మీద మొక్కను నాటి ఆ ఫొటోలను ఆన్‌లైన్‌లో పంచుకోవాలని పిలుపునిచ్చారు. ‘సుస్థిర జీవన విధానాలు, ప్రకృతిమాత రక్షణ కోసం మనకున్న నిబద్ధతలో భాగంగా ఈరోజు ఉదయం మొక్కను నాటాను. మన భూమిని మరింత మెరుగుపరిచేందుకు మీ అందరి సహాకారం అందించాలని కోరుతున్నాను. గత పదేళ్లలో చేసిన సమష్టి ప్రయత్నాలు దేశవ్యాప్తంగా అటవీ ప్రాంతాల విస్తీర్ణం పెంచాయి. దీనిలో స్థానిక సంస్థలు ముందుడడం అభినందనీయం’ అని ఎక్స్‌ వేదికగా మోదీ తెలిపారు.