‘ఉద్యోగాలకు భూమి’ కుంభకోణంలో లాలూపై సీబీఐ తుది ఛార్జిషీటు

దిల్లీ: రైల్వేశాఖలో ఉద్యోగ నియామకాలకు బదులుగా భూమిని పొందిన కుంభకోణంలో మాజీ రైల్వేమంత్రి లాలూ ప్రసాద్‌ యాదవ్‌తోపాటు మరో 77 మందిపై సీబీఐ శుక్రవారం తుది ఛార్జిషీటు దాఖలు చేసింది. వివిధ రైల్వే జోన్లలో ‘ప్రత్యామ్నాయం’గా నియామకాలు పొందిన అనర్హులైన అభ్యర్థుల నుంచి లాలూ కుటుంబం భూమి పట్టాలు పొందినట్లు సీబీఐ అభియోగం. ఈ కేసులో విచారణ ముగింపు సందర్భంగా కేంద్ర దర్యాప్తు సంస్థ మూడవది అయిన తుది ఛార్జిషీటును ప్రజాప్రతినిధుల కోర్టుకు సమర్పించింది. ఇందులో లాలూతోపాటు ఆయన భార్య రబ్డీ దేవి, కుమారుడు తేజ్‌ ప్రతాప్‌ యాదవ్, కుమార్తె హేమా యాదవ్, మాజీ ఓఎస్డీ భోలా యాదవ్, గతంలో లాలూ సిబ్బందిగా పనిచేసినవారిలో ఒకరు.. ఇలా మొత్తం 78 పేర్లు ఉన్నాయి. 29 మంది రైల్వే అధికారులు, 37 మంది అభ్యర్థులు, ఆరుగురు ప్రయివేటు వ్యక్తులు సైతం ఇందులో ఉన్నారు.