రెండు నెలల్లో ఆ కార్యాలయం ఖాళీ చేయండి

ఆమ్‌ ఆద్మీ పార్టీకి సుప్రీంకోర్టు ఆదేశం

దిల్లీ: జాతీయ రాజధాని దిల్లీలోని రౌజ్‌ అవెన్యూ ప్రాంతంలో ఉన్న పార్టీ కార్యాలయాన్ని రెండు నెలల్లో ఖాళీ చేయాలని ఆమ్‌ ఆద్మీ పార్టీ (ఆప్‌)ని సుప్రీంకోర్టు ఆదేశించింది. ఆగస్టు 10వ తేదీ కల్లా ఆ బంగ్లాను అప్పగించాలని జస్టిస్‌ విక్రమ్‌ నాథ్, జస్టిస్‌ సందీప్‌ మెహతాలతో కూడిన సెలవు కాల ధర్మాసనం సోమవారం స్పష్టం చేసింది. ఇదే స్థలాన్ని దిల్లీ హైకోర్టు విస్తరణకు కేటాయించడంతో వివాదం తలెత్తింది. ఈ అంశంపై మార్చిన 4న విచారణ జరిపిన సుప్రీంకోర్టు జూన్‌ 15కల్లా బంగ్లాలోని ఆప్‌ కార్యాలయాన్ని ఖాళీ చేయాలంటూ గడువు విధించింది. అయితే, ఆప్‌ తరఫు సీనియర్‌ న్యాయవాది అభిషేక్‌ సింఘ్వి అభ్యర్థన మేరకు ఆ గడువును సోమవారం మరో రెండు నెలల పాటు పొడిగించింది. ఈ స్థలంపై ఆప్‌నకు ఎలాంటి చట్టబద్ధమైన హక్కు లేదని, ఇదే చివరి అవకాశమని ధర్మాసనం విస్పష్టం చేసింది. తొలుత ఈ స్థలాన్ని జాతీయ పార్టీగా గుర్తింపు పొందిన ఆప్‌నకు కేటాయించినప్పటికీ 2017 జూన్‌ 13న ఆ ఉత్తర్వులను దిల్లీ లెఫ్టినెంట్‌ గవర్నర్‌ ఆదేశాల మేరకు ప్రజాపనుల శాఖ వెనక్కి తీసుకుందని సొలిసిటర్‌ జనరల్‌ తుషార్‌ మెహతా తెలిపారు. అయితే, ఈ ఉత్తర్వును దిల్లీ హైకోర్టు గతంలోనే కొట్టివేసిందని, రాజకీయ కారణాలతోనే ఆ కేటాయింపును రద్దు చేశారని  ఆప్‌ వాదిస్తోంది.