ఓ మహిళతో న్యాయాధికారి శృంగారచేష్టలు.. వీడియో వ్యాప్తి నిరోధానికి హైకోర్టు ఆదేశం

దిల్లీ: సామాజిక మాధ్యమాల్లో నవంబరు 29 నుంచి చక్కర్లు కొడుతున్న ఓ ‘శృంగార’ వీడియో వ్యాప్తిని తక్షణం ఆపాలని దిల్లీ హైకోర్టు ఆయా విభాగాలకు ఆదేశాలు జారీ చేసింది. ఓ మహిళతో న్యాయాధికారి ఒకరు లైంగిక చర్యల్లో పాల్గొన్నట్లు ఉన్న ఆ వీడియో షేరింగు కొనసాగితే ఫిర్యాది గోప్యతా హక్కులకు భంగం వాటిల్లుతుందని కోర్టు పేర్కొంది. బుధవారం రాత్రి ఈ కేసును విచారించిన జస్టిస్‌ యశ్వంత్‌వర్మ.. బాధితపక్షం గుర్తింపును దాచాలన్న అభ్యర్థనను ఆమోదిస్తూ మధ్యంతర ఏకపక్ష ఇంజెక్షన్‌ ఉత్తర్వులు జారీ చేశారు. న్యాయపరిపాలన విభాగంలో జరిగిన ఈ ఘటనను మొత్తం హైకోర్టు గుర్తించినట్లు తెలిపారు. ఆ వీడియో నిరోధానికి సామాజిక మాధ్యమాలు, ఇంటర్నెట్‌ సర్వీస్‌ ప్రొవైడర్లు చర్యలు తీసుకునేలా సంబంధిత అధికారులకు సమాచారం చేరవేయాలని రిజిస్ట్రార్‌ జనరల్‌ను కోర్టు పురమాయించింది. ఈ దిశగా తగిన చర్యలు తీసుకోవాల్సిందిగా కేంద్ర ప్రభుత్వాన్ని సైతం కోరింది. 2022 మార్చి 9న చిత్రీకరించిన ఆ వీడియోలో ఉన్న ఓ వ్యక్తి దాఖలు చేసిన దావాను అత్యవసర పరిశీలనకు స్వీకరించి కోర్టు పై ఆదేశాలు జారీ చేసింది. ఈ మేరకు కేంద్ర ప్రభుత్వానికి, సామాజిక మాధ్యమాలకు నోటీసులు జారీ చేసి.. తదుపరి విచారణ 9వ తేదీకి వాయిదా వేసింది.