దక్షిణ కొరియా మహిళా యూట్యూబర్‌కు ముంబయిలో వేధింపులు..

ఇద్దరు యువకుల అరెస్టు

ముంబయి: దక్షిణ కొరియాకు చెందిన ఓ మహిళా యూట్యూబర్‌ను ముంబయిలో వేధింపులకు గురి చేసిన ఇద్దరు ఆకతాయిలను పోలీసులు గురువారం అరెస్టు చేశారు. మంగళవారం రాత్రి ఈ ఘటన చోటు చేసుకుంది. బాధితురాలు ముంబయి నగరాన్ని ప్రత్యక్ష ప్రసారంలో చూపుతుండగా, ఓ యువకుడు ఆమె చేయి పట్టుకుని తన దగ్గరకు లాక్కునే యత్నం చేశాడు. ఆమె ప్రతిఘటించి వెళ్లిపోతుండగా, అతడు తన స్నేహితుడితో బైక్‌పై వచ్చి ఆమెను అడ్డగించాడు. తన వాహనం ఎక్కాలని బలవంతపెట్టగా ఆమె నిరాకరించింది. దీనికి సంబంధించి వీడియో సామాజిక మాధ్యమాల్లో వైరల్‌ అయింది. ఇది పోలీసుల దృష్టికి రావడంతో ఎఫ్‌ఐఆర్‌ నమోదు చేసి నిందితుల ఆచూకీని కనిపెట్టారు. 19, 21 ఏళ్ల వయసున్న ఆ ఇద్దరినీ అరెస్టు చేశారు.