Karnataka: ఎమ్మెల్యేలతో సిద్ధూ సమావేశం.. డీకే దూరం..!

ఇంటర్నెట్‌డెస్క్‌: కర్ణాటకలో ‘సీఎం మార్పు’ అంశంపై గత కొన్ని రోజులుగా తీవ్ర చర్చ జరుగుతున్న సంగతి తెలిసిందే. ఈక్రమంలో మరో పరిణామం చోటుచేసుకుంది. నియోజకవర్గ ఎమ్మెల్యేలతో ముఖ్యమంత్రి సిద్ధరామయ్య (Siddaramaiah) సమావేశం కానున్నారు. అయితే, ఈ భేటీకి ఉప ముఖ్యమంత్రి డీకే శివకుమార్ (DK Shivakumar) దూరంగా ఉన్నట్లు తెలుస్తోంది. ప్రస్తుతం ఇది చర్చనీయాంశంగా మారింది.

అభివృద్ధి పనుల నిమిత్తం ఒక్కో ఎమ్మెల్యేకు రూ.50కోట్ల గ్రాంట్‌ ఇవ్వనున్నట్లు ఇటీవల సీఎం ప్రకటించిన సంగతి తెలిసిందే. ఈ నిధుల కేటాయింపునకు సంబంధించి ఎమ్మెల్యేలతో సిద్ధరామయ్య విధానసౌధలో సమావేశం కానున్నారు. దీనికి డీకే దూరంగా ఉన్నట్లు సమాచారం. ఇది తమను ఎంతో ఆందోళనకు గురిచేస్తుందని కొందరు కాంగ్రెస్‌ నేతలు పేర్కొన్నారు. కాగా.. శివకుమార్‌ ఇలాంటి సమావేశాలకు దూరంగా ఉండటం ఇదేం కొత్త కాదని అధికారిక వర్గాలు తెలిపాయి. గత పదవీకాలంలో కూడా పలు భేటీలకు ఆయన హాజరుకాలేదని వెల్లడించాయి.

• కాంగ్రెస్‌లో మరో ముసలం.. మనీశ్‌ తివారీ పోస్టు వైరల్‌

ఇక, డీకే ప్రస్తుతం అనారోగ్యంతో ఉన్నారని, అందుకే ఆయన సమావేశానికి హాజరుకాలేకపోతున్నారని మరికొందరు తెలిపారు. మరోవైపు.. ఇలాంటి సమావేశాలు సాధారణంగా కర్ణాటక ప్రదేశ్‌ కాంగ్రెస్ కమిటీ (కేపీసీసీ) కార్యాలయాల్లో జరుగుతాయి. అయితే, ఈసారి విధానసౌధలో సీఎం ఛాంబర్‌లో ఈ భేటీ జరగనుండటం చర్చనీయాంశమైంది. డీకేను దూరం పెట్టేందుకు ఉద్దేశపూర్వకంగానే ఇలా నిర్వహించాలని నిర్ణయించుకున్నారని ఆయన మద్దతుదారులు భావిస్తున్నారు. వీటన్నింటిపై మౌనంగా ఉన్న శివకుమార్‌ తన కార్యకలాపాల్లో మునిగిపోయారు. 

కొద్దిరోజులుగా కర్ణాటక రాజకీయాలు చర్చనీయాంశంగా మారిన సంగతి తెలిసిందే. రెండున్నరేళ్ల అనంతరం ముఖ్యమంత్రి పీఠం మార్పు ఉంటుందని కాంగ్రెస్‌ అధికారంలో వచ్చినప్పటినుంచి ప్రచారం జరుగుతోంది. ఆ పార్టీ ఎమ్మెల్యేలు దాన్నే విశ్వసిస్తున్నారు. దీనిపైనే ఇటీవల కొందరు ఎమ్మెల్యేలు బహిరంగంగా వ్యాఖ్యానించారు. దీంతో రాజకీయం రసవత్తరంగా మారింది. అయితే, అగ్ర నాయకులు వాటిని తోసిపుచ్చారు. ఐదేళ్లూ తానే సీఎంగా కొనసాగుతానని సిద్ధరామయ్య కూడా స్పష్టంచేశారు. అనంతరం డీకే మాట్లాడుతూ.. తాను సీఎం కావాలని ప్రజలు కోరుకుంటున్నారని, అందులో తప్పులేదని వ్యాఖ్యానించారు.